Dili, 16/09/2019. Ministrio Ensino Superior, Ciéncia e Cultura (MESCC) S.E. Sr. Longuinhos dos Santos MM ne’ebé akompaña husi Sekretariu Estadu Arte no Cultura S.E. Sr. Teófilo Caldas, Direitor Jéral Administração e Finanças Ministerio Ensino Superior, Ciência e Cultura (MESCC), Sr. Hernâni Viterbo da Costa Soares no mós reprezentante husi Comisaun Funsaun Publika (CFP) Sr. Alfredo Bili Chefe Departamentu Rekrutamentu Nomeasaun, fo tomada de pose ba ajente Administrasaun Públika ne’ebé sei hala’o knar iha MESCC hamutuk ema nain 44.
Seremónia asinatura termu kontratu ho ajente Administrasaun Públika Ministério do Ensino Superior, Ciência e Cultura ne’e rasik realiza iha salaun inkontru hotel Novo Turismu Dili, Timor-Leste.
Ministro Ensino Superior, Ciência e Cultura (MESCC) S.E. Sr. Longuinhos dos Santos MM iha nia diskursu durante serimónia ida ne’e hato’o mós apelo ba funsionáriu públiku no ajente administrasaun publiku sira ne’ebé haknar an iha Ministerio Ensino Superior, Ciência e Cultura atu tenke ejerse sira nia funsaun ho diak.
“Tanba ne’e hau apelo ba ita boot sira tomak, funsionariu públiku, no mós ajente Administrasaun Públiku, katak hanesan funsionariu, hanesan Ajente Administrasaun públiku, tenke ezerse funsaun, hala’o servisu ho empenyamentu ne’ebé mak diak, ho profesionalismu, responsabilidade, honestidade, no disciplina, ida ne’e indikador, ida ne’ebé maka atu bele sasukat ba ita boot nia dezempeñu servisu durante ne’ebé maka hatur ona iha Lei Funsaun Públika, ida ne’e mós sai hanesan valor ba interese nasionál ne’ebé maka vale tebes ba ita bot sira uanhira hala’o ita boot sira nia Knar.” Hatete Ministro Ensino Superior, Ciência e Cultura (MESCC) S.E. Sr. Longuinhos dos Santos MM iha ninia diskursu.
Antes hakotu nia diskursu, Ministru MESCC mós kongratula ba Ajente Administrasaun Publika sira ne’ebé simu pose no hato’o mós votus susesu ba ajente administrasaun públiku ne’ebé mak atu kontribui ba Ministeriu MESCC no ministru mós husu nafatin atu ajente administrasaun públiku sira ne’ebé ohin simu posse atu nafatin hatutu sira nia prestasaun servisu, produtividade servisu, atu bele sai núdar sasukat ida ba prestasaun servisu husi ajente administrasaun publiku no mós ministeriu nia produtividade ne’ebé maka diak mak liu husi indikador sira mak hanesan lealdade, obedensia, responsabilidade, honestidade no mós disciplina.
Antes ne’e iha loron 13 fulan Maiu tinan 2019 Ministériu Ensinu Superior, Siénsia no Kultura hato’o karta pedidu konkursu públiku Ajente Administrasaun públika 44 ba iha Presidente Komisaun Funsaun Públika ne’ebé sei koloka iha Ministerio Ensino Superior, Ciéncia e Cultura (MESCC), ho nune’e maka iha loron 15 fulan Maiu tinan 2019 Presidente Funsaun Públika hasai despasu ho númeru 6129/2019/PCFP kona-ba autorizasaun kontratu traballu sob rubrika saláriu vensimentu 44 Ajente Administrasaun Públika hodi presta servisu iha MESCC to’o loron 31 fulan dezembru tinan 2019.
Bazeia ba oficio n° 393/2019,ho nune’e maka iha loron 27 fulan maiu tinan 2019 komisaun permanente ba rekrutamentu MESCC hahu fo sai avizu ba iha públiku kona-ba vaga Ajente Administrasaun Públika no ekipa rekrutamentu konsege simu dokumentus husi aplikantes sira hamutuk 2,891 ne’ebé maka fahe ba mane hamutuk ema nain 1,312 no feto hamutuk ema nain 1,579. Apliikantes ne’ebé mak aprovadu hodi hakat ba iha prova eskrita hamutuk ema nain 1,131 ne’ebé maka fahe ba mane hamutuk ema nain 502 no feto ema nain 629. Hafoin halo tiha prova eskrita ne’ebé mak realiza iha loron 16 fulan Jullu tinan 2019 iha CCD Merkadu Lama liu ba maka equipa konsege hetan kandidatu ba vaga ne’e hamutuk ema nain 185 ne’ebé maka kontinua kedas ba iha prosesu intervista ne’ebé realiza iha loron 21 to’o loron 27 fulan agustu tinan 2019 no iha loron 3 fulan setembru tinan 2019 komisaun permanente ba rekrutamentu fo sai rezultadu final no hetan ema hamutuk nain 44 ne’ebé mak kompostu husi mane ema nain 25 no feto ema nain 19 ne’ebé mak sei priense ba iha vaga sira ne’ebé durante ne’e mamuk iha Ministériu Ensinu Superior, Siénsia no Kultura.
Entertantu partisipantes iha serimonia asinatura termu kontratu Ajente Administrasaun Públika ne’e mak hanesan Ministrio Ensino Superior, Ciéncia e Cultura (MESCC) S.E. Sr. Longuinhos dos Santos MM, Sekretariu Estadu Arte no Cultura S.E. Sr. Teófilo Caldas, Direitor Jéral Administração e Finanças Ministerio Ensino Superior, Ciência e Cultura (MESCC), Sr. Hernâni Viterbo da Costa Soares, representante husi Comisaun Funsaun Publika (CFP) Sr. Alfredo Bili núdar Chefe Departamentu Rekrutamentu Nomeasaun ho nia equipa, Direitor Jerál, Direitor Nasionál, Inspeitur Jeral MESCC, Xefi Gabinete MESCC, Xefi Departamentu sira husi Ministeriu MESCC nian no mós Ajente Administrasaun Públiku hamutuk ema nain 44 ne’ebé mak asinatura termu kontratu Ajente Administrasaun Públika.