DILI,04/08/2017 (FDCH) Formasaun ba setór Seguransa nu’udar mós programa prinsipal ida ba iha Fundu de Desenvolvimento do Capital Humanu- FDCH tanba ne’e kada tinan sempre aloka orsamentu ba programa formasaun oi-oin hodi hasa’e liu-tan kapasidade membru Polísia Nasionál Timor-Leste (PNTL) nian.
Iha loron 04/8/2017 marka tan istória foun ida ba instituisaun Polísia Nasionál Timor-Leste (PNTL) tanba ninia membru ajente hamutuk ema na’in 114 no Ajente Polísia na’in 7 hosi nasaun São Tome Principe no Guine Bisau simu kargu nu’udar sarjentu hafoin remata tiha sira nia primeiru formasaun ba Sarjentu durante fulan ualu (8) iha sentru formasaun PNTL Comoro Dili.
Secretária Executiva interina Fundo de Desenvolvimento do Capital Humanu (FDCH) Sra. Leila ML Carceres ho orgullu tebes hodi partisipa iha serimónia enseramentu primeiru formasaun sarjentu ne’e tanba formasaun ne’e realiza hetan apoiu orsamentu hosi FDCH.
Ministru Interior Sr. Longuinhos Monteiro iha ninia diskursu ba serimónia enseramentu ne’e kongratula esforsu membru PNTL sira tanba konsege finaliza ona formasaun maibé kontinua husu ba Sarjentu PNTL foun sira atu sai profisional liu-tan iha futuru, nune’e bele garantia ba iha sidadaun sira nia liberdade.
“Ohin atu kongratula ita boot sira tanba tuir profisaun ne’ebé ezize maka’as hanesan profisaun ida ne’e,kursu ida ne’e estuda no halo análiza ba investigasaun ne’ebé sai hanesan trunfo decisivo do aperfeiçoamento no hadi’a dezenpeñu profisional,” hateten Ministru Interior Sr. Longuinhos Monteiro iha nia Diskursu.
Sr. Longuinhos Monteiro mós apresia no agradese ho apoiu orsamentu ne’ebé FDCH atribui ba formasaun ne’e.
“Ha’u mós hakarak agradese ba apoiu instituisaun seluk ne’ebé se la ho sira nia ajuda, kursu ba formasaun sarjentus la bele realiza, nomeadamente Ministerio do Planeamento e Investimento Estrategico (MPIE) liu husi Fundu de Desenvolvimento do Capital Humanu (FDCH) ne’ebé fó finansiamentu ba kursu tomak,”hatutan Ministro Interior Sr. Longinhos Monteiro iha nia diskursu.
Entretantu orsamentu ne’ebé aloka husi FDCH hodi apoiu ba iha jestaun operasaun ba primeiru Formasaun Sarjentu ne’e hamutuk $134,272.00 no konsege ezekuta hosi parte PNTL ho totál gastus hamutuk $77,787.50, no restu ne’ebé mak sei iha hamutuk $56,484.50.(Media FDCH)