Dili, 14/05/2019. Reprezentante husi  Assosiasaun Maritima Timor-Leste (AMTL) Sr. Faustino Amaral hamutuk ho estudante nain tolu ne’ebé hala’o sira nia estudu iha área Marítima iha Akademia Marítima Cirebon Indonesia apresenta-an mai iha Sekretariadu Tékniku Fundo de Desenvolvimento do Capital Humano (ST-FDCH) ne’ebé simu direta husi Sekretáriu Eksekutivu Fundo de Desenvolvimento do Capital Humano (FDCH)  Sr. Isménio Martins da Silva akompaña husi Koordenador GAPPEFIV Sr. Filomeno Lay, Koordenadora GAFRHI Sra. Leila Carceres, Koordenador GASEPA Sr. Aderito Soares no mós Chefe Departamentu DEMEREP Sr. Antonio Febu no Chefe Departamentu DERHI Sr. Virgilio Ramos  iha edifisiu FDCH, Salaun Knowledge Center FDCH.

Iha vizita ne’e representante Assosiasaun Maritima Timor-Leste Sr. Faustino Amaral alein apresenta Estudante nain tolu ba Sekretariu Eksekutivu FDCH aproveita mós relata kona-ba difikuldade balun ne’ebé mak estudante sira infrenta durante hala’o sira nia estudu iha Akademia Marítima Cirebon no husu mós atu oinsa mak estudante sira ne’e bele hetan apoiu balun husi governu atraves FDCH tanba durante ne’e sira selu-rasik sira nia eskola.

 “sira ne’e mós inan-aman hanesan halo to’os deit ne’ebé ami mai hakbesik an tok ba ita nia estadu, ami hakbesik an mai iha Sua Exelensia sira atu nune’e tetu tok ba”. Haktuir Sr. Faustino Amaral

 Hatan ba kestaun ida ne’e Sekretariu Eksekutivu FDCH Sr. Isménio Martins da Silva hatete katak maske estudante nain tolu ne’e la’os Benefisiariu husi FDCH maibé uainhira iha eskola mak haree ba iha notas ne’ebé diak mak iha mós maneira rua ne’ebé bele responde ba pedidu husu apoiu ne’ebé hatoo husi Estudante sira.

“ Saida mak ami bele ajuda ba ita boot sira, purezemplu ohin ita husu apoiu, se ita boot sira la’os penerima Beasiswa, iha maneira rua, ida ami bolu Bolsa Parsiál, ida seluk ami bolu apoiu Subsidiu Individuais, Ne’ebé kuandu ita boot sira nia nilai diak, ita boot sira nia área estudu ne’e importante, Purezemplu Marítima ne’e área ida importante tanba ne’e ba hau prioridade, entaun ita boot sira mai prepara, orsida hasoru señora Leila ho nia equipa no ho nia Chefe Departamentu hodi fo kriterius, ita haree nilai sira, surat husi Universidade tenki iha, surat pernyataan aktif kuliah tenki iha, depois orsida hatama ita haree”. tenik Sekretáriu Eksekutivu Fundo de Desenvolvimento do Capital Humano (FDCH)  Sr. Isménio Martins da Silva.

 Estudante nain tolu ne’e mak hanesan Miguel de Deus ne’ebé hala’o estudu iha área espesifiku transporte e gerenciamento de portas, Guido Verrissimo Marçal no Carlos N. Gonçalves ne’ebé hala’o estudu iha área espesifiku Kapitaun Ró Ahi. (Media-FDCH)

Related Post :


Total Viewer : 1830 Views || Category: Notisia