Dili/29/01/2019. Seretariadu T’ecnico Fundo de Desenvolvimento do Capital Humano (ST-FDCH) aprezenta dadus rekursu umanus iha Konsellu Inter-Ministeriál  iha Governu Konstitusional dala-ualu. Durante aprezentasaun FDCH re-afirma nia prontidaun hodi apoiu kapasitasaun Rekursus Umanus (RU) iha setór sira prinsipál hodi servisu hamutuk atu hasa’e rendimentu ekonomia iha  área naun petrolíferu nian.

Aléinde aprezensaun dadus benefisiarius FDCH nian husi tinan 2011-2019, FDCH mós prontu ezekuta no realiza orientasaun politika governu konstitusionál ba dala-ualu liu-liu oinsa apoiu formasaun iha área vokasionál ba joven sira hodi responde ba merkadu traballu rai laran no rai liur.

“Iha tinan 2019 nia laran FDCH sei asegura politika governu konstitusionál dala-ualu nian, liuhosi orientasaun Sua Exelensia Primeiru Ministru, nune’e FDCH sei foku ba iha finansia programas liuhosi SEFOPE hodi haforsa “skills” ka formasaun profísionál ba jovens no sidadaun tomak ba iha áreas prioritarias bazeia ba nesesidade merkadu servisu nian iha rai-laran no rai-liur”. Tenik Sekretariu Ezekutivu FDCH. Sr. Isménio Martins da Silva.

Entretantu sorumutu iha Konsellu Inter-Ministerial ne’e nudar kontinuasaun hosi sorumutu téknika ne’ebé mak linhas ministeriais no ajensia estadu relevante hala’o tiha ona durante ne’e.

“Ohin ekipa tekniku sira husi linhas ministeriais, instituisaun estadu sira no parseiru dezenvolvimentu sira mai halo aprezentasaun ida nudar “snapshot” ka imajen ida oinsa mak parte sira bele buka oportunidade hodi servisu hamutuk atu diversifika ekonomia, tanba ne’e mak prezensa ministru no sekretariu estadu sira bele iha desizaun politika ida atu orienta diak liutan servisu interligadu ba asuntu diversifikasaun ekonomia nian”. Tenik Koordenadora Reforma Fiskál, Sra. Fernanda Borges.

Iha tempu hanesan Primeiru Ministru Sua Exelencia Taur Matan Ruak iha ninia intervensaun hateten katak Ministériu relevante sira tenki mai fali ho proposta ida atu lori programa sira ne’e ba iha Konsellu Ministru hodi hetan desizaun politika.

Aléinde aprezentasaun hosi FDCH, iha mós aprezentasaun hosi Ministériu Turizmu,  Ministériu Agrikultura no Peska, Fundo Infraestrutura, SEFOPE, Ministériu Finansas, MNEC nomós parseiru dezenvolvimentu internasional sira, kona-ba dadus sira  ligadu ho oinsá halo diversifikasaun  ekonomia hodi hasa’e rendimentu iha setór naun petrolíferu .(Media FDCH)

Related Post :


Total Viewer : 857 Views || Category: Notisia