Dili, 24/04/2019 Secretariado Técnico Fundo de Desenvolvimento do Capital Humano (ST-FDCH) halibur bolseiru graduadus ho nivel lisensiatura (S1) hamutuk na’in 64 ne’ebé remata ona sira ninia estudu iha area oin-oin iha nasaun sira dalen Portugés ho Ingles hodi tuir teste molok atu hahú programa Estájiu Profisionál ne’ebé sei koloka ba instituisaun governu no instituisaun setór privadu sira ne’ebé iha interese.
Teste iha faze eskrita ne’e nudár meius ida atu bele hatene abilidade no koñesimentu bolseirus graduadus sira nian molok atu koloka sira ba partisipa iha Programa Estájiu Profisionál ne’ebé foin dala uluk Governu Timor-Leste realiza liuhosi ST-FDCH iha tinan ne’e.
Molok hahú teste ne’e Sekretáriu Ezekutivu Fundo de Desenvolvimento do Capital Humano FDCH Sr. Isménio Martins da Silva hato’o parabéns ba bolseiru graduadu sira no husu graduadu sira atu orgullu maske enfrenta situasaun oin-oin.
“Ha’u hato’o parabéns ba graduadus hotu-hotu, nudár sidadaun nasaun foun, primeiru tenke orgullu, apezar ho situasaun barak ne’ebé enfrenta maibé ita tenke orgullu,” hatete Sr. Isménio Martins da Silva ba Bolseiru graduadu sira iha Salaun knowledge Center FDCH.
Entretantu Coordenadora Gabinete da Administração, Financas e Recursos Humanos Internos (GAFRHI- FDCH) Sra. Leila Carceres informa programa Estajiu Profisionál ne’e sei atribui de’it ba bolseirus benefisiarius FDCH nian ne’ebé rejistu ona.
“Numeru bolseirus graduadus ne’ebé rejistu atu partisipa iha programa Estájiu Profisionál ne’e hamutuk 105, hosi númeru ne’e bolseirus graduadus mane 68 no feto 37,”hatete Sra. Leila Carceres.
Program Estájiu Profisionál ne’e rasik ofisialmente sei lansa iha tempu besik molok koloka bolseirus graduadus hirak ne’ebé submete ona sira ninia dokumentu mai Sekretariadu Tekniku Fundo de Desenvolvimento do Capital Humano.
Hein katak liuhosi programa ne’e bele fó oportunidade ba bolseiru garuadu sira hodi aumenta sira ninia esperiénsia servisu hodi bele hetan servisu tanba bolseiru hirak ne’ebé atu partisipa iha programa Estájiu Profisionál ne’e remata tiha sira nia estudu to’o ohin loron seidauk hetan servisu. (Media FDCH)