DILI, 27/07/2017 (FDCH) Secretário Executivo interinu Fundo de Desenvolvimento do Capital Humano (FDCH) Sr. Eusebio Adriano G. Bareto akompaña hosi Koordenadora Gabinete Sistema Pagamentu (GASEPA) Sra. Alcina Madeira partisipa iha serimónia aprezentasaun bolseiru graduadu iha area Akuntabilidade Finansas no IT hamutuk na’in lima (5) hafoin remata sira nia estudu iha universidade Australia Charles Darwin University ho Flinders University.
Serimónia aprezentasaun bolseiru benefisiariu hosi Ministeriu Finansas (MF) ho Fundo de Desenvolvimento do Capital Humano (FDCH) ne’e realiza iha Edifisiu foun Ministériu Finansas Aitarak-Laran, no nu’udar parte ida atu bele emprega fali benefisiariu sira bainhira remata ona sira nia estudu tuir kontratu ne’ebé governu estabelese ona ho bolseiru sira.
Secretário Executivo interinu FDCH Sr. Eusebio Adriano G. Barreto hato’o benvindu no fó parabéns ba bolseiru graduadu sira tanba konsege remata ona sira ninia estudu.
“Parabens ba ita boot sira tanba remata ona ita boot sira nia estudu, esperansa boot husi ami mak la’ós de’it aprezentasaun ne’ebé ita boot sira hatudu maibé pratika ka implementasaun ba ita boot sira nia servisu loro-loron ida ne’e mak presiza tebes hodi kontribui ba dezenvolvimentu nasaun doben ida ne’e nian,” hatete Sr. Eeusebio .
Entretantu Koordenadór Unidade Rekursu Humanus-Ministériu Finansas Sr, Abilio Barros Soares hateten programa aprezentasaun ne’e mak atu husu ba bolseiru sira atu aprezenta sira nia area estudu no mós esperiénsia ne’ebé sira hetan durante sira hala’o sira nia estudu iha rai li’ur molok atu re-integra no hahú servisu iha Ministériu Finansas.
“Ami mai ho ideia ida atu halo aprezentasaun kona-ba sira nia estudu no saida mak sira iha atu oferese ba ministériu ida ne’e, sira la presiza tan hakerek sira nia CV no lori map tama sai edifísiu iha Dili laran,” hateten Koordenadór Rekursus Humanus MF Sr. Abilio Barros.
Sr. Abilio hateten bolseiru sira ne’ebé nu’udar benefisiariu bainhira remata sira nia estudu tarde liu semana ida ka rua sira sei mai servisu kedas iha Ministériu Finansas nu’udar funsionáriu junior profisionál.
Tanba ne’e husu ba bolseiru graduadu sira atu servisu ho fuan no laran, tau interese nasionál aas liu kompara ho interese privadu no haktuir mós ba kontratu ne’ebé estabelese ho bolseiru sira bainhira remata ona estudu fila mai tenke servisu durante tinan tolu iha instituisaun ne’ebé oferese bolsa.
Entretantu perante serimónia, bolseru graduadu hirak ne’e ida-idak halo aprezentasaun kona-ba sira ninia area espesífiku ne’ebé sira hala’o estudu ba no hatudu mós sira nia kapasidade no abilidade oinsá aplika fali teoria ne’ebé durante ne’e sira hetan ona hosi sira nia estudu hodi fila mai kontribui fali ba dezenvolvimentu Timor-Leste ninian.
Programa re-integrasaun Bolseirus graduadus ba Liñas Ministériais hanesan modelu ida ne’ebé di’ak hodi kontinua implementa iha futuru uainhira benefisiarius Fundo de Desenvolvimento do Capaital Humano (FDCH) ba programa Bolsa Estudu remata sira nia kursu.
Modelu ne’e foin implementa iha Ministériu balun hanesan; Ministériu Finansa (MF) no Ministériu Saúde (MS), enkuantu Liñas Ministeriais seluk ne’ebé realiza programa Bolsa Estudu ba nia funsionárius automátikamente benefisiariu sira ne’e remata sei destaka iha liña Ministériu refere.
Tuir dadus ne’ebé FDCH iha to’o oras ne’e Fundo de Desenvolvimento do Capital Humano liuhosi Ministériu Finansas kontinua finansia bolseiru por volta ema na’in 20 resin ne’ebé sei ativu estuda iha universidade sira iha Australia.(Media FDCH)