Dili.09/10/2018.FDCH Bolseirus Graduadus nain 8 ne’ebé remata ona sira nia kursu iha Universidade Estadual da Paraiba Brasil, aprezenta an iha Sekretariadu Tékniku Fundo de Desenvolvimento do Capital (FDCH) iha edifisiu FDCH, Salaun Knowledge Center eis Edifisiu Ministeriu Finansas.
Bolseirus Graduadus hirak ne’e nain 3 remata kursu iha área Relasoens Internasionais, nain 3 remata kursu área Direitu, ida remata iha Siénsia Komputasaun no seluk fali remata kursu Medisina Dentaria.
Enkuantu bolseiru gradudu sira konfesa katak sira balun hahú hatama ona CV ( Curriculum Vitae) iha liña Ministerial balun maibé instituisaun hirak ne’e prefere esperiensia servisu minimu tinan 3 – 5, asuntu ne’e sai preokupasaun ba bolseirus graduadus tanba durante ne’e sira hala’o estudu no seidauk iha esperiensia servisu ne’ebé sufisiente atu prinxe rekezitu ne’ebé haktuir hosi instituisoens mensionadus.
Entretantu Sekretáriu Ezekutivu FDCH Sr. Isménio Martins da Silva haktuir katak parte sei esforsu atu aproxima Ministériu Relevantes hodi diskuti kona-ba estájiu profisionál ho objetivu atu bolseiru graduadu sira hetan esperiensia servisu tuir idak-idak nia área hodi hetan servisu iha futuru.
Sekretáriu Ezekutivu FDCH realsa katak nia parte sei hato’o relatóriu sorumutu ne’e ba Ministro Ensino Superior Ciência e Cultura Dr. Longuinhos dos Santos MM hodi hetan aprovasaun kona-ba Estájiu Profisionál nian no FDCH mós sei hare orsamentu ruma hodi apoiu programa Estájiu Profisionál ba bolseiru graduadu sira ne’ebé sai nudár programa integrante ida iha MESCC.
Partisipa iha sorumutu ne’e asesora FDCH Sra. Ana Paula dos Santos, koordenadores no Xefe depatamentu sira FDCH nian.
Iha tempu hanesan bolseirus graduadus prienxe mós formuláriu Baze de Dadus FDCH nian ne’ebé ho objetivu atu tracking tuir benfisiarius ninia estatutu depois remata sira ninia estudu. (Media FDCH)