Dili, 4/07/2018, Comitê de Avaliação Propostas e Subsidios (CAPS), Fundo de Desenvolvimento do Capital Humano (FDCH) halo diskusaun hodi halo pareser aprovasaun ba propostas subsídiu individuais hamutuk 12 ne’ebé timoroan sira hatama hodi husu apoiu finanseiru ba sira nia estudu.
Enkontru CAPS ne’e dirije direita hosi Secretário Executivo do FDCH Sr. Isménio Martins da Silva ne’ebé nu’udar Prezidente ba CAPS ho ninia membru sira mai hosi koordenadóres iha gabinete FDCH nian hanesan, Koordenadora Gabinete da Administração, Finanças e Recursos Humanos Internos GAFRHI, Sra. Leila Carceres, koordenadór Gabinete do Plano Pesquisa, Fiscalização e Verficação GAPPEFIV, Sr. Filomeno dos Santos Lay, Koordenadór Gabinete dos Servicos dos Pagamentos GASEPA, Sr. Aderito Soares, Gabinete de Gestão e Sistema de Informação GAGESI Sr. Henrique do Rosário no koordenadór Gabinete do Aprovisionamento e Logistica GAPLO Sr. Eugebio Bareto.
Durante timestre daruak tinan 2018 nian ne’ebé sura hosi fulan Abríl to’o Juñu proposta individuais ne’ebé ekipa hosi GAFRHI submete ba CAPS hamutuk 16 hosi proposta ne’e konsege halo aprovasaun ba proposta 12 tanba tuir duni kritéria ne’ebé FDCH iha, enkuantu proposta rua (2) pendente no ekipa hosi FDCH kontinua buka tan informasaun adisional ruma hosi proponente sira atu kompleta, proporsta ida (1) hetan aprovasaun ho conditional approve signifika proposta ne’e aprova maibe sei buka tan informasaun ruma hosi parte universidade, entretantu proposta ida (1) rejeita tanba proponente ne’e remata ona ninia estudu iha 2017 maibé pedidu foin hatama iha 23/5/2018.
Kriteria jerais atu aplika ba subsídiu individuais tenki kompleta dokumentus hotu-hotu ne’ebé fó sai hosi Sekretariadu Tékniku FDCH. Apoiu subsídiu ne’e sei fó dala ida de’it ba estudante ida dala ida wainhira hetan rekomendasaun hosi Comité Avaliasaun Proposta Subsídios (CAPS) hodi elabora no hato’o pareser ba CA-FDCH haktuir Artigu 11o ponto 3o iha Diploma Ministerial no 11/2011, 13 de Abril. Kompozisaun ba CAPS husi Secretário Executivo do FDCH ne’ebé prezidi, membrus mak Koordenadores iha Sekretariadu Tékniku FDCH nian, hanesan: GAPPEFIV, GAFRHI, GASEPA, GAPLO no GAGESI.
Enkuantu informasaun konaba kriterius ba apoiu subsidiu individuais nian fó sai iha buletin FDCH, website no fanpage FDCH. (Media FDCH)