Díli- 28/05/2018, Fundo de Desenvolvimentu do Capital Humano (FDCH) koopera ho Ministériu Negósiu Estranjeiru no Kooperasaun (MNEC) hodi realiza formasaun ba Diplomata nivel médiu hamutuk na’in 23 hodi hasa’e liután sira nia koñesimentu iha area diplomata nian.
Objetivu hosi formasaun ne’e hodi hafórsa kuadru médiu ba diplomata sira nian ho total 23 formandos ka partisipantes ho nivel Segundo Sekretáriu nian.
Formasaun ne’ebé sei hala’o hosi 27 Maiu – 01 Juñu ne’e sei foku liubá “Practical Skills” hodi hanorin atu hakerek ba: 1) situasaun “Seguransa” ba iha fatin ne’ebé sira “post” ba hanesan iha Embaixada RDTL ka konsuladu sira; 2) Formasaun Protocolo nian; 3) Aprende maneira oinsá atu hakerek no relata di’ak situasaun hirak ne’e.
Secretario Executivo do FDCH Sr. Isménio Martins da Silva iha diskursu hatete FDCH prontu atu servisu hamutuk nafatin ho MNEC atu tau orsamentu ba formasaun nian.
“Atu lori Timor-Leste ba iha rai li’ur ne’e la’ós de’it ho back round akadémiku de’it maibé buat ida pratika no skills sira ne’ebé ita iha hosi formasaun sira ne’e, ami sempre prontu para atu bele tau orsamentu,” hatete Secretario Executivo do FDCH Sr. Isménio Martins da Silva iha ninia diskursu ba abertura formasaun ne’ebé hala’o iha salaun MNEC.
FDCH ho MNEC sei esplora liu tan prioridades hodi identifika areas pertinentes ba formasaun Diplomata sira ba to’o fims/rohan husi tinan 2018, nomós sei diskute fali prioridades mós ba tinan 2019 nian.
Entretantu Sekretáriu Jerál MNEC Sr. Antonito de Araújo, apresia ho apoiu no kooperasaun servisu ne’ebé di’ak tebes ho FDCH hodi bele realiza tan formasaun daruak ne’e hodi hasa’e liután koñesimentu no abilidade diplomata sira nian.
Partisipante sira iha formasaun ne’e hamutuk na’in 23 ne’ebé hala’o sira nia servisu nu’udar diplomata, programa formasaun ne’e sei hasa’e liután koñesimentu, abilidade no kapasidade diplomata sira nian bainhira deskta sira ba servisu iha embaixada Timor-Leste nian iha rai li’ur.
Formadora ba formasaun ne’e mak Sra. Dinna Wisnu, PhD ne’ebé mai hosi Instituisaun Synergy Policy Indonesia nian.
Formasaun hanesan primeiru etapa ba diplomata senior sira hala’o tiha ona iha loron 12/03/2018 ne’ebé partisipa hosi diplomata senior sira hamutuk na’in 22. (Media FDCH)