Dili, 6/4/2018 Koordenadór Gabinete do Gestão e Sistema de Informação (GAGESI) Sr. Henrique do Rosario reprezenta Secretário Executivo do Fundo de Desenvolvimento do Capital Humano FDCH Sr. Isménio Martins da Silva partisipa iha serimónia enserramentu no atribuisaun sertifikadu ba formandu na’in 20 hosi Diresaun Jerál Servisu Imigrasaun hafoin remata tiha formasaun prevensaun tráfiku umanu no oinsá fó asisténsia ba vítima sira tráfiku umanu nian.
Iha diskursu ba enserramentu formasaun ne’e Sr. Henrique do Rosario hateten formasaun ba prevensaun tráfiku umanu no fó asisténsia ba vítima tráfiku umanu importante tebes no husu ba formandu sira atu implementa matenek ne’ebé sira hetan ona hosi formadór sira ba iha sira nia servisu fatin no iha sosiedade nia leet.
“Buat ne’ebé ita boot sira hetan tiha ona se bele karik la’ós implementa de’it iha instituisaun nia laran maibé iha fatin hotu-hotu iha sosiedade nia leet, iha uma iha família, tanba ita haree ba mundu ne’ebé global no mundu ne’e modernu tiha ona entaun tráfiku umanu ne’e infiltra tama mai to’o Timor tanba de’it buat tolu ne’ebé la halai sees hosi ekonomia, sosiál no pengaruh linkungan,” hateten Sr. Henrique do Rosario.
Atu prevene aktu tráfiku umanu ne’e formasaun sira hanesan ne’e importante tebes hanesan aimoruk karik bele kura neineik no bele halo akompañamentu nune’e bele fó mós asisténsia ho di’ak liután ba vítima sira tráfiku umanu nian.
FDCH prontu atu koopera no suporta nafatin ho ministériu hotu atu haree ba formasaun profisionál sira nune’e bele hasa’e liután koñesimentu servidór estadu nian.
Adjunto Diretór Jerál Servisu Imigrasaun Sr. Ricardo Moniz argradese ho apoiu no kooperasaun FDCH nian hodi realiza formasaun importante ne’e .
“Primeiru lugár ha’u hodi diretór jerál nia naran hato’o agradesementu dala ida-tan ba FDCH, iha biban ida ne’e, mezmu difisil ho situasaun orsamentu duodesimu nian ita konsege liu tiha situasaun ne’e hodi bele realiza formasaun tráfiku umanu ne’e to’o iha nia rohan,” hateten Adjunto Diretór Jerál Servisu Imigrasaun
Entretantu Formandu Alfredo Abel husu ba FDCH atu kontinua nafatin apoiu formasaun sira hanesan ne’e nune’e funsionáriu sira bele iha koñesimentu ne’ebé di’ak liu-tan.
“Ami agradese ba Fundo de Desenvolvimento do Capital Humano nian maske ho orsamentu ne’ebé limitadu mais ami konsege realiza duni ami nia treinamentu ne’e ho di’ak no susesu, ba oin ami sei kontinuasaun ami nia treinamentu husu ba Fundo de Desenvolvimento do Capital Humano atu suporta tan kontinuasaun ba treinamentu ne’e,” hateten formandu ne’e .
Nia dehan matéria sira ne’ebé hetan durante formasaun ne’e sai ona hanesan mata dalan ba sira atu hala’o atividade loro loron iha sira ida-idak nia servisu fatin.
Formasaun ne’ebé hala’o durante loron haat (4) ne’e ninia formadór sira mai hosi Procurador Geral da República (PGR), Provedoria dos Direitus Humanos e Justica (PDHJ), United Nation Development Program (UNDP) no ONG ALFELA.
Partisipa iha formasaun ne’e hamutuk ema na’in 20 ne’ebé kompostu hosi feto 11 no mane na’in 9, iha serimónia enserramentu ne’e remata ho entrega sertifikadu ba formandu sira. (Media FDCH)