Diskursu  Secretário Executivo FDCH Sr. Isménio Martins da Silva iha lansamentu livros no relatorios

Loron 18/05/2017

Fatin Centro Convenção Dili (CCD)

Sua Excelência Senhor Primeiro Ministro da RDTL, Doutor Rui de Araujo ma’ak atan-hau respeita,

Excelência Presidente do Parlamento Nacional no Vice Presidentes hamutuk ho Presidentes das Commissões, Presidentes das Bancadas ho distintos Deputados tomak,

Excelência Senhor Presidente do Tribunal de Recurso,

Excelência Sr. Kay Rala Xanana Gusmão, Ministro Conselheiro, Ministro do MPIE e Presidente do Conselho de Administração do FDCH, hamutuk ho membros permanentes do Conselho de Administração do FDCH: Ministro MCAS & Ministro da Educação, Ministra das Finanças, Ministro da Justiça, Ministro do MPRM e SEPFOPE,

Respeito mos ba Ministros Coordenadores, Excelências Membro do Governos hamutuk ho estrutura tomak,

Senhor Procurador Geral da República,

Entidades Autonomas inclui Presidente da Commissão da Função Pública, PDHJ, CAC no seluk tan.

Chefe Casa Civil da Presidência da República,

Eis Titular Doutor José Ramos Horta no Doutor Vicente Guterres,

Presidente ZEESM & RAEOA – Doutor Mari Alkatiri,

Representante Bispo de Diocese de Dili, Padre Ludgério Martins da Silva (Chanceller e Secretário de Diocese Dili),

Presidente da Câmara do Comercio e Industria (CCI),

Embaixadores no Parcerios Desenvolvimento tomak,

Diretor do NGO Forum no membros Sociedade Civil tomak,

Representantes Partidos Politícos iha Timor-Leste,

Académicos husi Instituto Superior/ Universidades sira iha Timor-Leste,

Senhoras e Senhores.

 

Ho haraik a’an no laran haksolok no’mos agradece ba oportunidade ne’ebé pela primeira-vêz Fundo de Desenvolvimento do Capital Humano (FDCH) liu husi Secretariado Técnico  organiza ceremônia ne’e, iha âmbito hodi celebra mos anniversário ba dala-6 desde ninian existência iha dia 23 de Março 2011.

FDCH hanesan Fundos Especiais hari’i tuir Lei Parlamentu, ne’ebé halo aprovasaun ba Orsamentu Jeral Estadu (OJE) ho no 1/2011 iha 14 Fevereiru 2011, husi Artigo 7o to’o Artigo 9o no mós termu previstu iha Artigo 32o husi Lei Parlamentu no 13/2009, 21 Outubru, ne’ebé koalia kona-ba instrumentu atu konsentra kompetênsias hodi determina, finansia no implementa polítika tomak governu nian ligadu ba dezenvolvimentu kualifikasaun, formasaun no kapasitasaun ba rekursus ka kapital umanu iha Timor-Leste. FDCH mos regulamentadu ho Decreto-Lei no 12/2011, 23 de Março, alteradu no republicado ho Decreto-Lei no 11/2015, 03 de Junho.

Estrutura a’as liu iha FDCH ma’ak Conselho de Administração do FDCH ne’ebé Presidente ma’ak Ministro Conselheiro e Ministro do MPIE, iha Conselho ne’e nian laran, iha Membro Permanentes do Conselho nain 5 ma’ak MCAS e Ministro da Educação, Ministra das Finanças, Ministro da Justiça, Ministro do Petróleo e Recursos Minerais no’mos SEPFOPE.

Objetivu jeral ba estabelesimentu fundu nian mak: “atu dezenvolve planu rekursu humanu nasional haktuir PEDN 2011-2030 no hodi apoia ba dezenvolvimentu nasional iha area oi-oin, mellora diak liutan planu, jestaun no implementasaun programa no mós garante lalaok programa ho ninia ezekusaun orsamentu públiku ne’ebé trasparente ho despeza governu nian relasiona ho kustus ba formasaun, bolsas de estudu no programa ba dezenvolvimentu rekursus humano iha Timor-Leste”.

Espesifikamente, haktuir Artigo 2o ba Dekretu Lei FDCH nian nebe temi ona iha leten, estabelesimentu Fundo Desenvolvimento do Capital Humano iha ninian objetivu hanesan mos tuir mai ne’e:

  • Assegura jestaun finanseira ba investimentu públiku iha area formasaun no dezenvolvimentu rekursu umanu nasional;
  • Garantia seguransa ba negosiasaun, asinatura ba akordu no projeitu sira plurianuais;
  • Mantein verbas orsamentu ne’ebé prevé ba FDCH iha final tinan fiskal ho objetivu atu garantia kontinuidade programa no projetu formasaun;
  • Promóve transparênsia no responsabilidade liu husi mekanismu no prosidimentu relatóriu no prestasaun servisu kona ba prosesu ezekusaun programa formasaun no projeitu dezenvolvimentu kapital umanu.

 

FDCH halaó ninian Programas financiamento  liu husi programas principais 4:

  1. Programa Formação Profissional; alvu ba futuros trabalhadores qualificados husi Centro de Formação responsabilisa husi SEPFOPE;
  2. Programa Formação Técnica; alvu ba funcionários publico atu hasae kapasidade no aumenta conhecimento técnico hodi reforsa servisu ne’ebé iha;
  3. Programa Bolsa de Estudo; alvu ba público Timor-Oan no funcionarios.
  4. Programas Outros Tipos de Formação; alvu ba formasaun especializadas: justica, defesa no segurança.

Husi programas ne’ebé refere, FDCH financia formasaun lubuk ida iha diversas áreas, ne’ebé ninian explikasaun detallu deskreve iha documentos ne’ebé sei lança ohin. Husi tinan 2011-2016, beneficiarios ne’ebé beneficia husi fundo ne’e hamutuk 56,482 pessoas (representa 35% beneficiarios feto). Total orsamentu alocado: $212, 532,000 ho nível ezekusaun media por volta de 87%. Orsamentu barak liu alocado ba Programa Bolsa de Estudo ne’ebé representa 49% husi total orsamentu alokadu no tuir fali ba iha Programa Formasaun Profissional ho 27%, Formasaun Téknika Funcionários sira ho total 15% no Programa Formasaun Especializadas ka Outros Tipos de Formasaun ho total 9%.

Husi alokasaun orsamentu ne’e, FDCH financia atividades formasaun  no bolsas de estudo iha áreas oin-oin husi sector hotu-hotu, maibe foca liu iha sectores prioritarias hanesan edukasaun, saúde, agricultura, turismo no seluk tan.

Iha área edukasaun liu husi formasaun dos professores, jestaun escolar, formasaun ba hari’i curriculo no seluk tan.

Iha área saúde, iha ona programa bolsas de estudos ba areas prioridades ba profissionais saúde nian, hanesan: enfermagem, parteira, dentista, Medicos Gerais, Medicos Especialistas iha area intervensaun primaria no seluk tan.

Ba iha área agricultura no pescas, mos iha ona programa bolsas de estudos ba áreas prioridades ne’ebé iha no formasaun seluk.

Iha mos áreas hanesan: áreas enginherias, Turismo & Hospitalidade, administrasaun pública ka boa governasaun, ICT (Informasaun no Técnologias), liderança, Petróleo, Justica, Igualdade Jeneru, Áreas Sociais, Jestaun, finanças & contabilidade, Auditoria, Cultura, disporto, Defesa, Segurança, media no áreas ka setores prioridades seluk.

Husi 2011 to’o ohin loron, com certesa iha desafios barak ne’ebé FDCH hasoru durante ninian implementasaun. Parlamento Nacional no Tribunal de Contas no karik público Timor-Oan sira hatene katak iha jestaun no kolokasaun ba recursos pessoais ma’ak precisa hadia tan, liu-liu hare ba iha setor público haktuir ba diagnostíco nacional ne’ebé SEFI no CFP halo hela daun-daun hamutuk ho processo Reforma Administração Pública ne’be Governo tau hela prioridade.

Desafio seluk ma’ak ita ninian capasidade mercado de trabalho ne’ebé sei menus hodi absorve trabalhadores qualificados no graduados depois de remata formasaun no bolsa de estudo iha nível ensino superior. Maske nune’e, ita hatene katak governo sei halo esforsu hodi halo reforma ecónomico no reforma fiscal hodi responde ba progresso desenvolvimento atu haforsa no haluan mercado de trabalho, no fo’o alternativa ba setor não-petrolifera. Tan ne’e, FDCH mos aloca ona orsamentu ba iha areas ne’ebé temi ona, ho orientasaun mos husi Presidente do CA-FDCH, ne’ebé dehan katak: “Se ita nian riku soin lolos ma’ak  ita nian rekursu humanus – la’os iha minarai, tambá ne’e, investe iha desenvolvimentu kapital umanu katak investe ba iha futuru”.

Nune’e duni, ceremonia ida ohin, ho orientasaun VI Governo Constitucional liu husi Conselho de Administração do FDCH ne’ebé orienta mai atan-ami iha Secretariado Técnico do FDCH atu jere no ezekuta plano governo nian hodi prepara documentos guiões/ matadalan no relatórios, hodi promóve transparênsia ba lalaok servisu durante ne’e, no’mos relata ba Excelências sira – servisu ne’ebé durante ne’e implementa ona husi FDCH.

Ho ida ne’e, permite atan-hau aprezenta ba Excelências sira, documentos no relatórios ne’ebé ami sei halo explikasaun breve husi aprezentasaun ne’ebé sei halo husi hau nian colegas membro equipa sira tuir mai. Documentos hirak ne’e ma’ak:

  • Análise e Mapeamento dos Recursos Humanos do Setor Público de Timor-Leste husi 2016 – 2030;
  • Relatório do FDCH tinan 5 nian: 2011-2015;
  • Avaliasaun Resultado Programas FDCH nian husi 2011-2014;
  • Relatório Servisu Anual 2016 nian;
  • Matadalan/ Guiões ba Formasaun no Bolsa de Estudo ba parceiros implementador sira;
  • Matadalan Servisu Operacionais hodi Executa Orsamentu no Programas FDCH nian ba linhas ministériais tomak no ba Secretariado FDCH rasik hodi sai baze;
  • Manual ba Funcionários Secretariado Técnico do FDCH; no
  • Aprezenta Website FDCH nian iha lian 3: Tetum, Portugês no Inglês, (inklui ami sei tau informasaun atividades iha pagína Facebook no videos iha Youtube) atu público alvo bele hetan acesso ba informasaun kona ba fundo, documentos, relatórios, matadalan no seluk tan, no acompanha progresso ka lala’ok servisu Secretariado FDCH, haktuir orientasaun husi CA-FDCH.

Husi documentos ne’ebé temi iha leten, ami entrega uluk documentos 4 no halo explikasaun ba conteudo cada documentos ka relatório  ne’ebé sei entrega uluk, no documentos 3 seluk, ami sei haruka ba Excias sira iha tempo badak nian laran, no’mos bele acesso iha website FDCH nian hahu husi semana oin.

Ho ida ne’e, lori Secretariado Técnico do FDCH, hakarak hato’o ami nian agradecimento wain ba Presidente do CA-FDCH no Membros Permanentes do Conselho ne’ebé deposita ona confiança ba ami, no fo’o  orientasaun politíca durante funcionamento no servisu, hodi jere orsamentu FDCH ho diak atu alkansa objetivo husi fundo ne’e rasik.

Agradece wain mos no respeito ba S.E. Sr. Primeiro Ministro no’mos ba governo tomak inclui colegas técnicos iha Ministérios no Secretaria do Estado tomak no parceiros hotu ne’ebé servisu hamutuk ona hodi halo ligasaun diak ba implementasaun programas durante ne’e, tanto hala’o programa iha rai-laran ka iha rai-liur.

Ikus liu, ami mos hakarak esklarese katak, ba oin, Secretariado do FDCH sei tenta nafatin atu hadia kualidade servisu, hanesan iha orientasaun Presidente do CA-FDCH ne’ebé temi katak: “bom planeamentu, bom orsamentasaun, ma’ak sei lori ba bom implementasaun”, no’mos ho orientasaun Conselho de Administração do FDCH nian, Secretariado do FDCH sei la taka dalan atu simu sugestaun no rekomendasaun ba melhoria qualidade servisu no ami sei esforço halo koordenasaun didiak atu acelera processo pagamento ba beneficiarios no fornecedores sira, servisu diak liu tan ho Ministério das Finanças liu husi sistema Freebalance ne’ebé iha, no ami mos sei la taka dalan atu servisu ho partes hotu-hotu inklui Sociedade Civil, hetan parceria diak mos hamutuk ho parceiros desenvolvimento sira no entidade patronal (stakeholders) sira hotu.

Tamba haktuir iha PEDN 2011-2030, katak, iha faze 1º husi 2011-1015 ma’ak faze ida “Dezenvolve recursos humanos”, no ba faze 2º husi 206-2021 ma’ak faze ida atu “Reforça Recursos Humanos” hodi alinha mos ho Objetivo Desenvolvimento Sustentavel (ODS) ne’ebé governo promove hela.

Ma’ak ne’e deit, karik mos durante ceremonia ida ohin, iha buat ruma ma’ak la monu ba Excelências sira nian laran, nu’udar foin sa’e ho experiencia ne’ebé sei menus, ho haraik-a’an hakarak hato’o desculpa wain. Agradece wain mos ba presença, paciencia hodi rona no’mos atensaun ba Excelências sira hotu. Obrigado barak.

Related Post :


Total Viewer : 2792 Views || Category: Notisia