Díli, 02 Fevereiru 2022, Sua Exelensia Ministru Ensinu Superior Siénsia no Kultura (MESCC-sigla Portugés) no Prezidente Konsellu Administrasaun Fundo de Desenvolvimento do Capital Humano (CA-FDCH) Sr. Longuinhos dos Santos aprezenta Diretór Ezekutivu foun ba Fundo de Desenvolimento do Capital Humano (FDCH) Dr. Cristovão dos Reis hodi troka diretór Ezekutivu sesante Sr. Hermenegildo da Silva, sorumutu aprezentasaun ne’e hala’o iha salaun Knowledge Center Palacio do Governo.
Prezidente CA-FDCH Sr. Longuinhos dos Santos hatete ho nomeiasaun diretór ezekutivu foun ne’ebé mai husi funsionáriu públiku ne’e ho objetivu rua no atu lori mós ambiente foun ba servisu iha FDCH.
“Iha objetivu rua ne’ebé lori ha’u para nomeia diretór ezekutivu foun ne’ebé hola parte husi Estatal, normalmente hahú inisiu ita promove internal, portantu iha objetivu ida mak ita aprova ona dekretu lei nú 13/2020 iha artigu 10 mensiona atu implementa se la implementa ita viola lei ne’e, ho nune’e ha’u buka timoroan ne’ebé mai husi profisional,” hateten Sr. Longuinhos dos Santos.
Ministru hato’o agradesimentu ba diretór sesante ne’ebé hala’o ninia knar durante fulan neen, no konsege hala’o servisu importante sira FDCH nian no husu ba diretór sesante atu kontinua kolabora ho diretór foun hodi hala’o servisu nune’e bele lori progresu ba dezenvolvimentu nasaun nian liu-liu iha dezenvolvimentu rekursus umanus iha Timor-Leste.
Diretór Ezekutivu FDCH foun Dr. Cristovão dos Reis hatete maske nia mai mesak maibé ho apoiu no servisu hamutuk ho funsionáriu no kargu xefia sira ne’ebé iha, sei lori FDCH ba oin tanba intituisaun ne’e importante tebes no instituisaun ne’ebé ninia funsaun atu prepara ema no joven sira ba futuru país nian.
“Ho komfiansa ne’ebé haraik mai ha’u, ha’u mesak sim todan, ha’u mai iha ne’e ha’u mesak de’it, maibé ha’u ninia família boot iha ne’e besik 50, ha’u ho sira, sira ho ha’u todan ne’ebé mak iha ami hamutuk hodi hakat, ha’u fó komfiansa tomak bai ta-boot sira se ita-boot sira la fó komfiansa tomak ba ha’u ita hamutuk ba rai kuak,” hateten Diretór Ezekutivu Dr. Cristovão dos Reis.
Entretantu diretór ezekutivu FDCH sesante agradese ba komfiansa ne’ebé prezidente CA-FDCH ho membru sira depozita ba nia hodi lidera FDCH durante fulan neen, durante mandatu finaliza ona servisu sira ne’ebé husik hela husi Diretora Ezekutiva FDCH Sesante ne’ebé rezigna-an tanba assuntu familia.
Dr. Cristovão durante ne’e hala’o kna’ar nudár dosente iha Universidade Nacional Timor Lorosa’e nune’e, mós Dr Cristovão nu’udar benefisiariu ida husi FDCH banhira hala’o ninia estudu doutoramentu iha Portugal. (Média_FDCH)