Lisboa. 09/05/2016(FDCH). Ekipa Avaliadór FDCH halo sorumutu ho Embaixadora Maria Paixão iha embaixada RDTL ba Portugal iha Lisboa.

Sorumutu ne’e nudár parte husi vizita kortejia no informa ajenda servisu ekipa FDCH nian durante halao aktividade  servisu iha Portugal ba Embaixadora Maria paixão.

Aléinde ne’e Ekipa Avaliadór FDCH halo mós audit ba konta Embaixada nian ligadu ho orsamentu ba Programa Bolsa Estudu ne’ebé haktuir iha Ministériu Edukasaun iha tinan 2014.

“Tuir mandatu ne’ebé mak atribui ba iha FDCH katak FDCH iha obrigasaun atu garante lalaok ezekusaun orsamentu jerál estadu ba iha programas hotu-hotu atu nune’e ninia bele hetan rezultadu ida diak tuir objetivu programa FDCH nian”. Haktuir Sekretáriu Ezekutivu FDCH Sr. Isménio Martins da Silva.

Entretantu Embaixadora Maria Paixão ho nia ekipa simu Ekipa Avaliadór FDCH ho haksolok no fó apoiu tomak ba ekipa avaliadór FDCH, iha parte seluk nia parte mós kopera ho ekipa auditor interna ligadu ho orsamentu ba programa Bolsa Estudu nian.

“Monitorizasaun ida ne’e importante tebe-tebes atu ita labele gasta osan arbiru no laiha proveitu, tanba ema barak hein hela osan ida ne’e, karik ho monitorizasaun ida ne’e para ba oin ne’e iha implentasaun ida que diak tebe-tebes”. Embaixadora Maria Paixão haktuir.

Ekipa avaliadór kompostu husi Sekretariu Ezekutivu FDCH Sr. Isménio Martins da Silva, Diretór Planeamentu Peskiza no Fiskalizasaun FDCH Sr. Paulo Miguel Dos Santos, Konsultora Téknika FDCH Sra. Ana Paula dos Santos, Reprejentante Gabinete Bolsa Estudu Ministeriu Edukasaun Sr. Guilherme Cardoso Mau no Auditór Interna Ministeriu Finansa Sr. João Bosco. Sorumutu ne’e akompaña husi Adidu Edukasaun  RDTL iha Portugal Sr. Rojer Rafael Soares ho nia ekipa.(Media FDCH)

Related Post :


Total Viewer : 3891 Views || Category: Notisia