Díli, 21/08/2020, Ekipa Téknika Fundo de Desenvolvimento do Capital Humano (FDCH) ne’ebé Kompostu husi Secretariado Comissão da Função Publica (SCFP), Instituto Nacional Administração Publica (INAP) ho FDCH rasik aprezenta relatóriu ba superior instituisaun tolu hanesan Prezidente CFP Sr. Faustino Cardoso no Komisáriu CFP Sr. Antonio Freitas, Komisária CFP Sra. Carmeneza Monteiro, Diretora Ezekutiva FDCH Sra. Leila M.L. Carceres dos Santos no Diretór Jerál INAP Sr. Agostinho Letencio hodi halo apresiasaun ba proposta atividade formasaun, bolsa estudu no asisténsia estudu funsionáriu públiku nian ba tinan 2021.
Relatóriu ne’e aprezenta hafoin ekipa téknika konvoka tiha enkontru ho Diretór Jerál, Diretór Rekursus Umanus no Pontu Fokál sira hodi halo avaliasaun ba proposta atividade formasaun no bolsa estudu ba funsionáriu públiku sira ne’ebé sei hala’o iha 2021 tuir prioridade no nesesidade instituisaun ida-idak nian.
Ekipa téknika ne’e rasik forma husi CFP, INAP ho FDCH iha 12/06/2020 ne’ebé sai nu’udar ekipa ida hodi halo avaliasaun no revizaun ba planu, programa formasaun no bolsa estudu Liña Ministerial nian molok submete mai iha Sekretariadu Tékniku FDCH hodi submete ba Conselho Administrasaun FDCH nian atu halo aprovasaun.
Avaliasaun ne’e halo bazeia ba dekretu Lei nú 13/2020 15 de Abril Regulamentu FDCH nian ne’ebé atribui mós kompeténsia ba CFP ho INAP.
Atividade aprezentasaun ne’e rasik hala’o iha Sala CFP, Matadoru ne’ebé partisipa mós husi Koordenadór sira husi FDCH, Asesora Téknika FDCH, Sekretáriu Ezekutivu CFP, Diretór no ekipa Téknika CFP nian. (Média FDCH.)