DILI, 2/10/2017 (FDCH) Coordenador Gabiete Sistema no Informação (GAGESI) Sr. Henrique do Rosário akompaña hosi Xefe Departamento Media e Relações Publicas Sr. António Febu hosi  Secretariado Técnico- Fundo de Desenvolvimento do Capital Humano (FDCH)  partisipa iha abertura ba treinamentu  SEA digital Class  (Southeast Asian Digital Class) ne’ebé realiza hosi Embaixada Indonesia iha Timor-Leste  liuhosi Pusat Budaya Indonesia  ba dosente no mestre sira.

Treinamentu ne’e realiza ho objetivu atu fó koñesimentu ba dosente no mestre sira liu-liu iha área teknolojia no informátika ninian. Tanba ne’e treinamentu ne’e sei realiza iha faze tolu hanesan (1. Formasaun kona-ba oinsá utiliza sistema aplikasaun iha servisu fatin edukasaun nian, (2. Forma konteúdu hanorin nian ho video no (3. Fó koñesimentu prosesu aprendizajen on line.

Embiaxador Indonesia ba Timor-Leste Sr.Sahat Sitorus hateten Indonesia ho Timor-Leste iha kooperasaun ida-di’ak tebe-tebes tanba ne’e liu hosi treinamentu ne’e bele kontribui atu dezenvolve rekursu umanu Timor-Leste nian.

“Liu hosi treinamentu ne’e atu bele ajuda dezenvolve kapasidade dosente no mestre sira nian iha área teknolojia no informátika,” dehan Embaixador ne’e iha ninia diskursu ba abertura treinamentu ne’e iha salaun KBRI Mascarinhas.

Coordenador GAGESI FDCH Sr. Henrique do Rosario apresia ho programa ne’e tanba programa espesífiku liu-liu area teknolojia no informátika bele lori ema akompaña situasaun iha mundu no ohin loron iha Timor-Leste Ministériu sira hotu uza sistema teknolojia no informátika nune’e importante tebes treinamentu sira hanesan ne’e.

Coordenador ne’e husu ba partisipante sira atu partisipa ho ativu iha treinamentu  nune’e bele aprende buat ruma hosi formador sira durante treinamentu ne’e hala’o.

Abertura ba treinamentu ne’e loke direita hosi Embaixador Indonesia ba Timor-Leste Sr.Sahat Sitorus no akompaña hosi adidu edukasaun Indonesia ba Timor-Leste Dr. Sedercor Melatunan ho konvidadus sira hanesan Coordenador GAGESI FDCH. Sr Henrique do Rosario ho Xefe Departamento Media e Relações Publicas Antonio Febu no Diretór Nasionál Ensinu Superior Sr. Luis Aparicio Guterres no Diretor Ensino Baziku Ministériu Edukasaun Sr. Alfredo Araújo.

Partisipante sira ba treinamentu ne’e mai hosi dosente Universidade sira no mestre sira hosi eskola Secundario sira iha kapitál Díli hamutuk ema na’in 40.(Media FDCH)

Related Post :


Total Viewer : 1226 Views || Category: Notisia