Dili, 12/03/2018 Fundo de Desenvolvimento do Capital Humano (FDCH) apoiu orsamentu ho montante $ 7.650 00 hodi finansia formasaun ba Diplomata Senior no Media sira hamutuk ema na’in 22 ne’ebé hala’o iha Ministériu Negósiu Estranjeiru no Kooperasaun (MNEC).

Formasaun ne’e ho objetivu atu  bele aumenta no haforsa koñesimentu diplomata sira nian atu prepara-an ho di’ak liu bainhira sira destaka ba servisu iha rai li’ur.

Ministru Negósiu Estranjeiru no Kooperasaun (MNEC) S.E. Sr. Aurelio Guterres apresia no agradese ho apoiu ne’ebé FDCH oferese hodi realiza formasaun ba diplomata sira atu melhora di’ak liután sira nia koñesimentu.

“Espesifikamente atividade ne’ebé sei halo iha semana ida ne’e nia laran sei foku ba iha formasaun ba iha diplomata senior sira ho karreira media sira iha MNEC atu oinsá prepara-an antes ba destaka iha rai li’ur,” hateten Sr. Aurelio Guterres.

Aurelio Guterres hateten formasaun ida ne’e hola parte ba planu ne’ebé trasa tiha ona iha tinan rua liu-ba, oinsá mak bele aumenta, haforsa no melhora  koñesimentu diplomata sira iha Ministériu no mós abilidade linguístika iha ministériu.

Secretário Executivo FDCH Sr. Isménio Martins da Silva hateten FDCH hetan priviléjiu atu servisu hamutuk ho Ministériu Negósiu Estranjeiru no Kooperasaun atu haforsa liután kapasidade diplomata sira nian.

“Orsamentu ne’ebé FDCH aloka hodi apoiu ba formasaun ne’e  ho montante orsamentu porvolta $ 7.650 00 hodi apoiu no finansia atraves de instituisaun Synergy policy ne’ebé servisu mós ho embaixada repúblika  Indonesia iha ne’e, ne’ebé ita konvida formadora ne’e mai hosi Indonesia,” dehan Sr. Isménio Martins da Silva

Secretário Executivo FDCH ne’e orgullu no fiar katak formasaun durante semana ida ne’e sei apoiu no haforsa liután ita nia diplomata sira tanba maioria sira destaka ona ha rai li’ur, nune’e mós FDCH sempre prontu atu servisu hamutuk di’ak liután ho MNEC.

Entretantu Embaixadór Indonesia ba Timor-Leste Sr. Sahat Sitorus ne’ebé partisipa iha abertura ba serimónia formasaun ne’e sente orgullu tanba liuhosi formasaun sira hanesan ne’e bele hasa’e liután kapasidade diplomata sira nian atu hala’o sira nia servisu ho profisionál liután iha rai li’ur.

“Ami mós orgullu hola parte mós iha dezenvolvimentu kapasidade diplomata Timoroan sira atu iha kapasidade ne’ebé di’ak liu iha mundu,” dehan Sahat Sitorus.

Formadór ne’ebé fó formasaun ba diplomata sira ne’e mai hosi formadora no espesialista sira iha area diplomasia internasionál hosi Indonesia.(Media FDCH)

Related Post :


Total Viewer : 829 Views || Category: Notisia