Dili, 23/11/2021. Diretor Ezekutivu FDCH Sr. Hermenegildo da Silva, MdP akompaña husi Koordenador GASEPA Sr. Aderito Soares no Koordenadora Interina GAPPEFIV Sra. Maria Rosa simu delegasaun Administrasaun Autoridade Navegasaun Aero Timor-Leste Empreza Públika (ANATL, EP), iha edifisiu FDCH Palaçio do Governo.

Prezensa delegasaun ne’e iha FDCH hodi hala’o enkontru hodi koalia liu kona-ba oinsa maka iha futuru mai FDCH bele oferese formasaun ba iha ANATL,EP, iha enkontru ne’e ANATL,EP ko’alia mós kona-ba sira nia rekursus umanus ne’ebé maka sira prepara ona atu sai núdar sira nia funsionariu liliu iha parte Aviasaun nian.

Iha oportunidade ne’e ANATL,EP hato’o mós sira iha planu Bolsa Estudu ba públiku iha tinan fiskal 2022 ba Benefisiariu nain 6 ne’ebé sei ba hala’o estudu iha Polytekbang iha área Estudu Aviasaun nian no ida ne’e sai mós núdar preparasaun Rekursus Umanus atu responde ba politika Governu nia ne’ebé halo investimentu bo’ot ba Aero Portu Presidenti Nicolao Lobato. Iha oportunidade ne’e ANATL,EP mós husu atu nune’e sira bele ba halo monitorizasaun no avaliasaun ba Estudante nain 6 ne’ebé maka daudaun ne’e hala’o hela estudu iha Aviation Polytechnic (Poltekbang) Surabaya, Indonesia.

Entertantu Diretor Ezekutivu FDCH Sr. Hermenegildo da Silva, MdP iha nia intervensaun hato’o katak ko’alia kona-ba Formasaun entaun ANATL,EP tengki halo kordenasaun ho INAP no mós Komisaun Funsaun Públika atu nune’e parte hotu bele hala’o servisu bazeia ba lei no kompetensia ne’ebé maka daudaun ne’e estabele ona alein ne’e kona-ba Bolsa Estudu Diretor Ezekutivu FDCH ne’e mós hatete katak ba oin maka sei haree hamutuk kona-ba asuntu ida ne’e.

Antes ne’e iha tinan 2019 liu ba ANATL,EP no FDCH konsege ona haruka Timoroan hamutuk nain 6 hodi ba hala’o estudu iha Politeknik Penerbangan Surabaya-Indonesia no ba hala’o estudu iha área Estudu Air Traffic Control (ATC) ema nain 2, Airport Electricity ema nain 2, no Airport Engineering ema nain 2 no daudaun ne’e sira nain 6 besik ona finaliza sira nia estudu no sei fila hikas mai Timor-Leste no sei hala’o servisu iha ANATL,EP núdar funsionariu ba iha instituisaun ida ne’e rasik.(Media FDCH)

 

Related Post :


Total Viewer : 39 Views || Category: Notisia