Dili, 08/01/2018, Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva afirma katak dadus Rekurusus Umanus (RU) ne’e tenke uza ho didi’ak atu responde ba nesesidade traballu timoroan hotu, bainhira halo ninia diskursu iha Konferénsia Nasionál kona-bá Situasaun Jerál Merkadu Traballu iha Timor-Leste(TL) ne’ebé organiza hosi Secretária de Estado da Joventude e do Trabalho (SEJT) iha Timor Plaza, Dili.
“Dadus ne’ebé ami (FDCH) iha, mai para kompleta tan dadus sira ne’ebé SEJT iha tiha ona, importante mak ita tenke uza dadus sira ne’e ho didi’ak, para bele responde nesesidade traballu timoroan hotu,” hatete Sr. Ismémio Martins
Konferénsia loron sorin-balun, ne’ebé loke direitamente hosi Sekretáriu Estadu Joventude no Traballu Sr. Nívio Leite Magalhâes partisipa hosi entidades balun mak liga direita ho merkadu traballu hanesan ONG’s, Grupu Kooperativa, KSTL no funsionáriu SEJT.
Iha ninia diskursu, Sr. Nívio Leite Magalhâes hato’o ninia benvindu ba Sekretáriu Ezekutivu FDCH ho ninia ekipa. Alende ne’e hato’o mós polítika governu nian oinsá bele hadi’a merkadu traballu iha oin mai.
“ VII Governu liuhosi SEJT hanoin ona atu hadi’a sistema merkadu traballu iha Timor-Leste ne’e atu sai di’ak liutan, tanba ne’e mak ami konvida ita-boot sira mai iha ne’e para bele fó lisuk hanoin saida mak ita hotu presiza hadi’a iha tempu oin mai”. tenik governante ne’e.
Entretantu iha parte seluk, FDCH mós hetan oportunidade atu aprezenta rezultadu peskiza relasiona ho asuntu merkadu traballu. Iha biban ida-ne’e Koordenadór GAPEVIV-FDCH Sr. Filomeno dos Santos no Dr. Afonso de Almeida mak aprezenta rezultadu Levantamentu Dadus Rekursu Umanu Ezistente iha Timor-Leste ne’ebé FDCH hala’o iha tinan 2016 liubá.
“Dadus sira ne’e pronto hotu ona, hein deit atu públika depoisde hetan ona aprovasaun hosi Konsellu Ministru,” dehan Dr. Afonso de Almeida iha ninia aprezentasaun.
Tuir observasaun, maizumenus ema hamutuk 80 ne’ebé partisipa iha konferénsia refere ho entuziazmu maka’as atu rona aprezentasaun ne’ebé hato’o hosi reprezentate FDCH ne’e. Diretór-Jerál SEJT iha ninia diskursu bainhira taka konferénsia ne’e hato’o parabéns ba FDCH no iha esperansa katak relatóriu levantamentu refere bele sai sasukat ba governasaun oin mai iha sira (governu) nia polítika, iha konferensia ne’e halo mos lansamentu ba livru Enterprise and Skills Survey 2017 ne’ebé hakerek hosi SEJT. (Media FDCH).