Dili, 14/07/2016 (FDCH). Sekretáriu Ezekutivu FDCH. Isménio Martins da Silva ho Ekipa Tékniku FDCH entrega esbosu Rezultadu Estudu Avaliasaun ba Programa FDCH periodu 2011-2014 no Mapeamentu Rekursu Umanu Nasionál ba eis Prezidente Parlamentu Nasionál Francisco Lu-Olo Guterres iha sede Comite Central Fretilin – CCF iha Komoro.
Rezultadu husi estudu rua ne’e identifika daudaun ona prioridades hirak ne’ebé mak presiza atu hare hamutuk hodi trasa politika diak ba dezenvolvimentu pais ne’e.
“Objetivu husi sorumutu ne’e atu mai informa mós ba S.E. Sr. Lu-Olo kona-ba rezultadu peskiza rua ne’ebé Sekretariadu Tékniku FDCH finaliza daudaun, alein de ne’e parte Sekretariadu hakarak rona mós feed back husi Sr. Francisco Lu-Olo nudár eis titular kona-ba saida mak presiza atu hadia tan ligadu ho dezenvolvimentu kapital umanu nasionál. Tenik Sekretáriu Ezekutivu FDCH Isménio Martins da Silva.
Sekretáriu Ezekutivu informa katak FDCH halo ona kapasitasaun ba timor-oan sira kuaze iha area oi-oin ba pessoal ne’ebé servisu iha instituisaun públiku no naun-públiku liu hosi programa formasaun no bolsa estudu.
“Rekursu umanu ita komesa desenvolve daudaun ona agora oinsa mak ita bele koloka fali ita nia rekursu umanu sira ne’e atu servisu tuir area ida-idak nian no servisu tuir sira nia kapasidade.” Haktuir Isménio Martins da Silva.
Iha parte seluk eis Prezidente Parlamentu Nasionál Francisco Lu-Olo hateten katak nia parte agradese ba informasaun ne’ebé hetan husi Sekretariadu Tékniku FDCH, sei le’e dokumentus ne’e no sujere atu kontinua diskusaun iha futuru ligadu ho rezultadu peskiza nian ne’e.
Eis Prezidente PN ne’e rekoñese katak Timor-Leste presiza hadia diak liutan kapital umanu tanba durante ne’e sai hanesan prokupasaun boot ne’ebé estadu ne’e sei infrenta.
“ Iha kualker instituisaun estadu ita bele hatete organizadu ho diak, bele iha tarefa servisu no planu ne’ebe diak maibe presiza duni ema ho kapasidade para bele ezekuta, no koalia kapasidade rekursu umanu iha Timor-Leste ne’e sei sai desafiu boot ida ba ita hotu, ami iha Partidus politikus mós rekuñese kestaun ida ne’e”. Haktuir Eis Prezidente PN no Atual Prezidente Partidu Fretilin Francisco Guterres Lu-Olo.
Enkuantu Sekretariadu Tékniku durante ne’e fahe mós informasaun ka rezultadu husi estudu rua ne’e ba Linhas Ministeriais hotu inklui fahe ona esbosu dokumentus ne’e ba Konselho Ministru , orgaun soberanu no sei fahe mos informasaun ba komponente hotu-hotu iha nasaun ne’e hodi nune’e ema hotu iha informasaun konaba progresu iha area rekursu umanu nian.
Iha oportunidade ne’e Dr. Afonso de Almeida nudár Peskizador FDCH aprezenta mós Peskiza “segundu ronde” ka survey rekursu umanu nasionál kada uma kain iha Territóriu tomak.
“Survei ne’e atu hatene dadus espésifiku rekursu umanu tuir Munisípiu to’o kedas iha kada suku no aldeia, ho nune’e ita sei hatene area saida mak presiza atu hetan tan formasaun no area servisu saida mak ita nia ema sira prefere hakarak servisu hodi koresponde ho nesesidades industria nian iha futuru”. Tenik Afonso de Almeida.
Iha parte seluk Sekretariadu Tékniku FDCH hahú daudaun halo preparasaun ba survey refere no sei involve Ministeriu relevante hanesan Ministeriu Edukasaun, Ministeriu Administrasaun Estatal, Estatistiku Nasionál husi Ministeriu Finansa no PNDS.
Entretantu espetativa husi survey rekursu umanu nasionál kada uma kain nian ne’e sei sai hanesan planu estrtejiku nasionál iha area rekursu umanu nasionál ba Timor-Leste no tuir planu sei hahú iha fulan agostu tinan ne’e no sei finaliza iha fulan Fevereiru 2017. (Media FDCH)