Coimbra, 6 Dezembru 2022. Diretór Ezekutivu Fundo de Dezenvolvimento do Capital Humano (FDCH), Dr. Cristóvão dos Reis asina akordu kooperasaun ho Vice-Reitor para Relações Externas e Alumni da Universidade de Coimbra iha salaun Reitoria.
Partisipasaun iha serimónia asina akordu kooperasaun ne’e, Adidu Edukasaun husi Ministériu Ensinu Superior, Siénsia no Kultura RDTL ba Portugal, Sr. Natalino de Jesus Gusmão Soares, Koordenadora Lian Português ba Programa Bolsa Estudu husi ST-FDCH, Sra. Suzana Mendonça, Xefe Departamentu Rekursus Umanus ST-FDCH nian, Sr. Virgilio Ramos da Costa no Reprezentante estudante Timorense iha Universidade de Coimbra.
Objetivu prinsipal husi asina akordu kooperasaun ida ne’e, atu fasilita prosesu birokrátiku, logistiku no sai hanesan enkuadramentu legal ida ba ST-FDCH hodi prosesa pagamentu hotu (kustu propinas, kustu moris no kustu sira seluk) iha Ministériu Finansas Timor-Leste relasiona ho bolsa estudu ne’ebé atribui ona husi Governu Timor-Leste liu husi FDCH ba bolseirus Timor oan sira hodi hala’o sira nia estudu iha universidade refere.
Universidade de Coimbra koiñesidu hanesan universidade mais antiga iha Portugal no mos sai hanesan universidade internasional ida iha mundu liu-liu iha parte Eropa.
Hafoin Timor-Leste restaura nia independensia iha loron 20 Maiu 2000, universidade ida ne’e mos kontribui ona ba iha prosesu dezenvolvimentu rekursus umanus iha Timor-Leste liu husi produz ona médicos, advogados, educadores, engenheiros no figura importante balun iha vida politika no sosial nasaun nian.
Akordu kooperasaun ho universidades de Coimbra bele realiza tuir duni ajenda ne’ebé planeadu ona tanba hetan apoiu másimu no protukolu ida organizadu husi Gabinete Adidu Edukasaun Timor-Leste nian iha Embaixada RDTL iha Lisboa Portugal.