Díli, 23 Marsu 2022, Fundo de Desenvolvimento do Capital Humano (FDCH-MESCC) ofisialmente asina  ona kontratu ho bolseirus  programa Bolsa Hakbi’it  350 ba tinan akademiku 2022 ne’ebé selesionadu hodi kontinua sira nia estudu iha Universidade Nacional Timor Lorosa’e (UNTL), serimónia ne’e realiza iha salaun Auditóriu UNTL, Hera.

Kontratu ne’e asina direta husi Diretór Ezekutivu FDCH  Dr. Cristóvão dos Reis ho bolseiru benifisiariu ba programa Bolsa Hakbi’it no hetan vistu direta husi Magnifiku Reitór UNTL Dr. João Soares Martins ne’ebé akompaña mós husi estrurura tomak.

Bolseiru hamutuk atus tolu lima nulu (350) ne’e sei halao sira nia estudu iha UNTL ho nivel de estudu iha Lisensiatura (S1) iha fakuldade sira hanesan Edukasaun Artes e Humanidades, Siénsia Sosiais, Medisina no Siénsia de Saúde, Ekonomia no Gestaun, Engeñaria Siénsia no teknologia, Agrikultura, Direito no Filosofia.

Diretór Ezekutivu  Dr. Cristóvão dos Reis FDCH iha nia diskursu ba serimónia ne’e, husu ba bolseiru sira  atu aproveita opurtunidade ne’ebé iha no foku ba estudu nune’e, bele termina sira nia estudu ho diak tuir kontratu ne’ebé estabelese ona husi FDCH ho bolseiru sira.

“Oportunidade ida ne’e di’ak tebes, tanba ne’e husu ba alin sira atu aproveita no estuda didi’ak, tanba timoroan barak mak presiza tulun ida ne’e, ita bo’ot sira hetan ona tulun ida ne’e dalan maka aproveita liu husi estuda no estuda tanba kompetisaun husi tempu ba tempu aas ba bebeik no se la aproveita didi’ak ita boot sira sei lakon oportunidade ida ne’e.” hateten Diretór Ezekutivu FDCH Sr. Cristóvão dos Reis durante diskursu.

Reitor UNTL Dr. João Soares Martins, Agradese ba VIII Governu liu husi FDCH ne’ebé iha inisiativa di’ak hodi fó bolsa estudu ba Familia kbi’it menus sira hodi hetan oportunidade atu asesu eskola ba nivel ensinu superior iha Universidade privadu no publiku rai-laran no hato’o mós mensajen atu bolseiru sira utiliza no jere insentivu ne’ebé sira simu ho montante dolares rihun ida rua nulu ($120) ho didi’ak .

“Custo de vida ida ne’e bele ajuda no bele fasilita ona ita-bo’ot sira nia estudu e hakarak osan ne’e investe totalmente ba apoiu estudu nian hanesan sosa livru, sosa pulsa atu asesu ba internet, selu transporte ba eskola no uza ho responsabilidade no labele gasta arbiru uza hodi apoiu ita- bo’ot sira.”  hateten Reitor UNTL Dr. João Soares Martins

Durante serimónia Coordenador Gabinete de Coordenação e Execução de programas e projetos e de Gestão de Sistema de Informação do ST-FDCH Sr. Henrique do Rosario aprezenta mós kona-bá lalaok no prosesu bolsa Hakbi’it nian no esplika pontu importante sira ba klauzula ne’ebé estabelese iha kontratu.

“ Bolseirus sira iha Obrigasaun barak tebes ne’ebé estabelese iha kontratu, iha ne’e ha’u foti pontos importante deit  katak, obrigatoriamente estudante tenke remata iha períudu ne’ebé hatuur, labele troka kursu, entrega notas aproveitamentu akademíku tinan-tinan, kumpre regras funsionamentu internu universidade nian, hetan aproveitamentu di’ak no seluk tan.”

Serimónia asina kontratu ho bolseirus sira ne’e  partisipa husi, Vise Reitor,  pro Reitor sira husi UNTL, koordenadór GAPPEFIV – FDCH) Sr. Hermenegildo da Silva no Reprezentante inan-aman husi Bolseirus sira hotu.(Média_FDCH)

Related Post :


Total Viewer : 2595 Views || Category: Notisia