Dili, 29 Abril 2022, Ministériu Ensinu Superior Siensia no Kultura (MESCC) liuhusi  Fundo de Desenvolvimento do Capital Humano (FDCH) selebra serimónia asina nota entendimentu ho Institutu no Universidade Privadu  hamutuk 13 ne’ebé sei simu bolseiru bolsa parsial tinan akadémiku 2022 hamutuk 1000.

Asinatura Nota Intendimentu ne’ebé realiza iha salaun Knowledge Center, FDCH ne’e,  asina direita husi Diretór Ezekutivu FDCH Dr. Cristovão dos Reis ho Reitor sira, Prezidente instituto sira no hetan testemuña husi Ministru Ensinu Superior Siénsia no Kultura Dr. Longuinhos dos Santos ne’ebé nu’udar Prezidente Konsellu Administrasaun ba FDCH.

Hafoin estabelese tiha nota entendimentu ne’e, iha tempu besik FDCH sei koloka bolseirus bolsa parsial  ba universidade no institutu  hodi hala’o sira ninia estudu ho nivel oi-oin hahú husi Diploma III to’o Lisensiatura tuir area estudu ne’ebé bolseiru sira hili ona iha tempu inskrisaun ne’ebé FDCH realiza iha Munisipiu hotu no RAEOA ho kooperasaun Ministériu Edukasaun Juventudu no Desportu (MEJD).

Iha implemtasaun programa bolsa parsial nivel nasionál  ba dahuluk, iha tinan akademiku 2022 ne’e sei benefisia bolseiru hamutuk 1000 ne’ebé sei hala’o estudu iha area importante sira hanesan Edukasaun, Saúde, Agrikultura, Enjeñaria no Teknolojia, Turizmu, Direitu no Siensia Sosial.

Durante bolseiru sira hala’o sira nia estudu, Governu liu husi FDCH sei apoiu finanseiru hodi selu kustu propinas kada semestere to’o sira termina sira nia estudu no kustu moris  bolseiru sira nian sei selu husi inana-aman.

Universidade no Instituisaun sira ne’ebé asina Nota Entendemimentu  ho FDCH mak hanesan: 1.Universidade da Paz (UNPAZ), 2. Universidade Dili (UNDIL), 3. Universidade Oriental Timor Lorosa’e (UNITAL), 4. Dili Institute of Technology (DIT), 5. Institute of Business (IOB), 6. Institutu Superior Cristal (ISC), 7. Instituto Ciência da Saude (ICS),  8. East Timor Coffee Institute (ETCI),  9. Instituto Proffesional de Canosa (IPDC), 10. Instituto São João de Brito (ISJB), 11. Instituto Boaventura Timor Leste (IBTL), 12. João Saldanha Institute (JSI) no 13. Universidade Catolica Timorense São João Paulo II (UCTL).

Programa Bolsa Parsial ne’e implementa bazeia ba Diploma Ministérial N.o 78/2021 de 10 de Novembro relasiona com Regime de atribuição de bolsas de estudo para frequência no território nacional e regulamentação dos pedidos individuais de apoio financeiro ao estudo de Ensino superior acreditado nacional. Artigo 4.° sobre  atribuição de  Bolsa Parcial”.

(Média_FDCH)

Related Post :


Total Viewer : 722 Views || Category: Notisia