DÍLI, 23 Fevereiru 2022. Diretór Ezekutivu Fundo de Desenvolvimentu do Capital Humano (FDCH) Dr. Cristóvão dos Reis akompaña husi Koordenadór GASEPA-FDCH Sr. Aderito Soares no Xefe Departamentu DERHI Sr. Virgilio Ramos da Costa realiza enkontru ho Diretór Ezekutivu Banku Nasionál Komersiu Timor-Leste (BNCTL) Sr. Brigido de Sousa ho ekipa hodi ko’oalia kona-bá posibilidade kooperasaun instituisaun rua nian, iha Edifisiu FDCH.
Objetivu husi enkontru ne’e hodi halo diskusaun kon-bá estabelesimentu akordu kooperasaun instituisaun rua nian hodi fasilita transferensia no pagamentu kustu moris ba bolseiru sira programa Bolsa Estudu Hakbi’it nian ne’ebé hala’o estudu iha instituisaun ensinu superior sira iha rai-laran.
Durante enkontru parte rua konkorda atu estabelese akordu kooperasaun institusional ida iha tempu besik hodi fasilita servisu hamutuk FDCH ho BNCTL nian nune’e bele hafasil transferensia orsamentu kustu moris bolseiru sira nian no transferensia propinas bolseiru sira nian ba universidade sira ne’ebé bolseiru sira hala’o estudu ba.
Programa bolsa estudu Hakbi’it hahú implementa husi FDCH iha tinan kotuk ho ninia benefisiariu 910 ne’ebé mak ohin loron hala’o hela sira ninia estudu iha universidade no instituisaun ensinu superior sira iha rai-laran no iha tinan ne’e sei benefisia tan benefisiariu 1000. (Média_FDCH)