DILI, 21/8/2017(FDCH) Ministru Planeamentu no Investimentu Estratéjiku interinu S.E. Sr. Gastão de Sousa ho Secretário Executivo Fundo de Desenvolvimento do Capital Humano –FDCH Sr. Isménio Martins da Silva entrega sertifikadu apresiasaun ba supervizór Estudu Levantamentu Dadus Rekursus Humanus  (LDRH).

Ekipa supervizór (Ekipa 13) ne’e forma kompostu hosi diretór no funsionáriu sira hosi FDCH,  Program Nasionál  Dezenvolvimentu Suku PNDS no Diresaun Geral Estatistika Ministeriu Finansas nian.

Iha diskursu ba serimónia apresiasaun no entrega sertifikadu ne’e Ministru Interinu MPIE Sr. Gastão de Sousa  apresia tebes  ho servisu ne’ebé diretór no funsionáriu sira halo tanba liu hosi estudu ne’e konsege hatudu dadus ne’ebé importante tebe-tebes ba nasaun foun ne’e.

“Parabéns ba ekipa tomak ba servisu boot ne’ebé ita-boot sira halo, rezultadu ne’ebé hatudu di’ak tebe-tebes, atu governu se-se de’it mak mai dadus sira hanesan ne’e importante tebe-tebes,” hateten Sr. Gastão.

Ministru interinu ne’e husu mós ba Sekretariadu Tékniku-FDCH atu koopera di’ak ho governu foun ne’ebé atu forma iha tempu besik no importante tebes atu prepara relatóriu servisu FDCH nian atu aprezenta ba iha Konsellu Ministru.

Nune’e mós Secretariu Executivo-FDCH Sr. Isménio Martins da Silva hatete setrifikadu ne’ebé entrega nu’udar parte apresiasaun ida ba funsionáriu no diretór sira ne’ebé hola parte hodi realiza servisu importante ne’ebé FDCH iha.

“Ita-boot sira halo servisu ida-di’ak tebe-tebes tanba ita konsege kobre hotu suku sira iha Timor laran tomak, servisu ne’ebé iha FDCH la servisu mesak maibé servisu ho ita-boot sira,” dehan Secretário Executivo FDCH Sr. Isménio M. da Silva hodi apresia servisu ne’ebé ekipa ne’e realiza.

Entretantu Diretora PNDS Sra. Dulce Junior Guterres hateten durante ne’e PNDS haree de’it ba infrastrutura báziku tanba ne’e bainhira simu orientasaun atu halo estudu ne’e iha fulan rua nia laran sente todan tebe-tebes maibé to ikus rezultadu ne’ebé hatudu maske la’ós di’ak liu maibé di’ak tebe-tebes.

“Fó foun ami simu servisu ne’e todan maibé servisu nasaun nian ne’ebé entrega ba ita hotu atu halo servisu ne’e no ikus mai ita hotu haree ninia rezultadu ne’ebé hatudu ami dehan de’it wao,” hatete diretora ne’e.

Enkuantu durante serimónia ne’e koordenadór Peskiza ba LDRH Dr. Afonso de Almeida halo mós aprezentasaun ba dadus preliminaria hosi estudu Levantamentu Dadus Rekursus Humanus ne’ebé halo iha tinan 2016 no sei publika iha tempu besik. (Media FDCH)

Related Post :


Total Viewer : 1154 Views || Category: Notisia