Dili, 12/02/2018, Fundo de Desevolvimentu do Capital Humano (FDCH) hala’o enkontru ho Liña Ministeriais (LMs) sira iha salaun enkontru edifísiu FDCH nian. Enkontru ne’ebé lidera direta hosi Sekretáriu Ezekutivu FDCH Sr. Isménio Martins da Silva ne’e ninia objetivu atu fahe informasaun konabá Dotasaun Orsamentu Temporariu (DOT) ba iha pontu fokál hosi liña ministeriais sira.
Entretantu Sekretáriu Ezekutivu iha ninia introdusaun hatete katak FDCH simu responsabilidade atu jere orsamentu duo-décimo ba programa liña ministeriais nian “orsamentu duo-décimo ne’ebé aloka mai FDCH atu to’o ka la-to’o FDCH tenki jere tuir pakote ne’ebé iha” tan ne’e ema númeru um iha FDCH ne’e aumenta katak orsamentu ne’e sei fó prioridade ba programa ne’ebé sei iha prosesu kontinuasaun nia-laran no bolsa-estudu.
“orsamentu DOT hanesan nafatin ba programa kontinuidade, signifika laiha problema ho programa bolsa-estudu” dehan Sekretáriu Ezekutivu durante ninia introdusaun atu fó esperansa ka halakon dúvidas balun konabá DOT. Maibé iha parte seluk Sekretáriu Ezekutivu ne’e mós ko’alia bá liña ministeriais liuhosi sira nia, diretór jerál, diretór nasionál no pontu fokál atu kumpre planu ne’ebé FDCH hato’o ona ba sira.
Iha parte seluk, Koordenadór Gabinete Planu, Peskiza, Fiskalizasaun no Verifikasaun (GAPPEFIV) Sr. Filomeno dos Santos hato’o mós ba partisipante sira atu hadi’a estatístika hatama proposta programa mai iha FDCH.
“Labele husik programa sira ne’e ba hotu iha fim do ano tanba afeita tebe-tebes ba prosesu pagamentu” hatete Koordenadór Gabinete Planu, Peskiza, Fiskalizasaun no Verifikasaun (GAPPEFIV) Sr. Filomeno dos Santos durante ninia aprezentasaun.
Alende Koordenadór GAPPEFIV, iha biban ida-ne’e mós Koordenadór hotu-hotu hetan oportunidade hato’o ida-idak nia programa ba partisipante sira. tan ne’e la lakon oportunidade mós ba Koordenadór GAGESI (Gabinete do Gestão e Sistema de Informação) Sr. Henrique do Rosário aprezenta mós sistema BMIS ne’ebé kria hosi FDCH ba partisipantes sira.
“Sistema BIMS ne’e nia ending maka relatóriu” tenik koordenador GAGESI (Gabinete do Gestão e Sistema de Informação) Sr. Henrique do Rosário durante ninia aprezentasaun.
Liutan Sr. Henrique saliénta katak BIMS ne’e nu’udar sistema ne’ebé fasil ba ita atu halo relatóriu, tantu husi LMs mai iha FDCH ka hosi FDCH ba iha na’i ulun sira.
Iha lidun seluk aprezentasaun ne’e hetan apresiasaun hosi partispantes sira tanba bele ajuda ona LMs sira bainhira halo relatóriu ba iha FDCH. Florindo Napolião hosi SEDPAC kontente ho sistema BMIS ne’e tanba bele ajuda ona liña ministeriais sira atu halo relatóriu.
“Ha’u sente sistema BIMS ne’ebé FDCH kria ne’e di’ak tebe-tebes tanba ajuda ona ami atu hetan informasaun no halo relatóriu”. Haktuir Sr. Florindo Napolião hosi SEDPAC
Enkuantu bainhira fo tempu husu no hatán ba partisipante sira, barak mak apresia teb-tebes ho sistema BIMS ne’e, úniku ema ida mak Sr. Luis Ércio husi CAC ne’ebé louva no fó parabens ba esforsu ne’ebé FDCH halo ona atu kria sistema ida-ne’e.
“Ha’u fó parabéns ba FDCH ne’ebé kria ona sistema database ne’e ho furak tebes” temi pontu fokál ne’e iha durante sesaun husu no hatán. Tenik Sr. Luis Ércio husi CAC
Enkuantu Sr. Aderito Soares nu’udar Koordenadór GASEPA (Gabinete Sistema Pagamentu) ko’alia ba partisipantes sira katak proposta sira tenki hatama iha premeiru semana para labele defikulta pagament.
“Agora ne’e la hanesan uluk, ne’ebé husu ba liña ministeriais sira atu hatama proposta labele iha fim do mês” dehan Koordenandor ne’e durante nia aprezentasaun.haktuir Sr. Aderito Soares nuudar Koordenador GASEPA.
Entretantu Koordenador GAPLO (Gabinete Aprovizionamentu no Lojístiku) Sr. Eusébio Barreto iha ninia aprezentasaun ko’alia liu ba sistema R.I.R. (Receive, Inspection, Return) ba partisipantes sira katak tenki kolabora nafatin ho FDCH atu halo RNI ba sasán sira tama.
“Husu ba liña ministeriais sira atu kontaktu mai ami bainhira hatama sasán hosi kompañia, para ami bele haruka ekipa ida bá atu halo inspesaun uluk molok ezekusaun”. Haktuir Sr. Eusébio Barreto
Tuir observasaun, enkontru ne’e marka prezensa hosi pontu fokál sira ne’ebé mai hosi 37 Liña Ministeriais hamutuk ema nain 85 konta ho prezensa funsionáriu FDCH nian rasik. Enkontru ne’ebé sita tempu óras 2 ne’e taka direitamente hosi Sekretáriu Ezekutivu FDCH Sr. Isménio Martins da Silva. Bainhira atu taka enkontru refere, Sekretáriu Ezekutivu dala ida-tan fó hanoin nafatin ba pontu fokál sira konabá tempu atu hatama proposta.
“Fó hanoin nafatin ba liña ministeriais sira hotu atu hatama proposta ka pedidu ruma ne’e sedu ituan selae bele prejudika nia prosesu pagamentu” dehan Sr. Isménio durante taka serimónia. (Ekipa Media FDCH)