COVALIMA, 14/03/2018. Secretariádo Técnico do Fundo de Desenvolvimento do Capital Humano – FDCH servisu hamutuk ho PNDS no MAE halo konsultasaun ba áreas Potensialidades no Prioridades ba Desenvolvimentu Rekursus Umanus iha Munisipiu sira inklui Covalima.
Objetivu husi programa ne’e maka atu partilla informasaun sira husi munisípiu kona-bá potensialidade no prioridades programas kada setorais nune’e ba futuru FDCH sei tau ba planu iha Orsamentu Jerál Estadu (OJE).
Prezidente Autoridade Covalima Sr. Afonso Noguera Nahak iha ninia intervensaun hatete katak presiza duni atu hasa’e kualidade rekursus umanus iha munisípiu sira, nune’e bele responde ona potensialidades no programas prioridades sira iha munisípiu.
“Orgullu boot tanba FDCH hakarak to’o ona iha ita nia fatin atu rona ita nia hanoin sira ne’e, tanba ita presiza duni hasa’e ita nia rekursus umanus iha area hotu-hotu, tan ne’e husu ba partisipantes sira karik orsida iha diskusaun nia-laran atu bele fó hanoin ruma konabá programas sira durante ne’e seidauk konsege realiza no identifika to’ok potensialidade saida mak ita nia munisípiu ne’e iha, atu nune’e ita bele prepara ita nia rekursus umanus hodi responde ba potensialidades sira ne’e”. Tenik Sr. Afonso durante halo abertura ba programa refere.
Iha biban hanesan, reprezentante FDCH Sra. Maria Rosa Pinto hato’o objetivu husi programas konsultasaun ne’ebé mak FDCH hala’o iha tinan 2016 liubá katak dadus sira ne’e nuudar premelináriu no presiza hetan tan informasaun ruma atu komplementa dadus ne’ebé iha ona.
“Ohin ami mai, atu hato’o rezultadu dadus ne’ebé ami hetan durante FDCH nia levantamentu iha tinan 2016 liubá, presiza hatene mós dadus sira ne’e nuudar premelináriu no seidauk kompletu, tan ne’e importante tebes-tebes atu ita-boot sira hato’o saida mak presiza komplementa iha dadus ida-ne’e”. Haktuir Maria Rosa.
Entretantu molok atu hetan informasaun sira husi partisipantes, reprezentante seluk FDCH nian Sr. Atanásio Soares aprezenta uluk rezultadu Munisípiu Covalima nian ne’ebé hala’o iha tinan 2016 liubá.
Aprezentador ne’e mós husu ba partisipantes atu hato’o sira nia preokupasoins ka sujestaoins ruma kona-bá rezultadu levantamentu dadus refere. Nune’e ekipa FDCH sei elabora no kompleta liután dadus sira ne’ebé iha ona.
Edmundo Ferreira ne’ebé sai mós partisipantes iha programa ne’e, hato’o agradese ba FDCH tanba ho dadus sira ne’e bele ajuda funsionárius iha munisípiu atu identifika formasaun ba sira a’an rasik.
“Ami agradese tebetebes ba FDCH tanba aleinde identifika potensialidades munisípius, fó mós aportunidade mai ami funsionárius atu hasa’e ami kapasidades ho típu rekursus umanus ne’ebé ami presiza tantu edukasaun formál ka formasaun profesionais” haktuir Diretór Edukasaun ne’e.
Enkuantu partisipantes ne’ebé partisipa iha programa konsultasaun refere mai husi Diretores, Xefi Departementus husi kada setorais iha munisípiu refere no Prezidente CCI inklui mós autór bisnis Covalima oan sira. (Media FDCH)