Díli, 05/11/2019, Fundo de Desenvolvimento do Capital Humano (FDCH) halo audiénsia ho Komisaun G Parlamentu Nasionál ne’ebé trata asuntu Edukasaun, Juventude, Kultura no sidadania hodi hato’o relatóriu ezekusaun orsamentu 2019 nomós Planu Orsamentu Jerál Estadu (OJE) FDCH nian ba 2020.

Aprezentasaun ne’e hala’o husi Koordenadora Gabinete Administração Finanças e Recurços Humanos Internos  (GAFRHI- FDCH) Sra. Leila Carcerres dos Santos ne’ebé akompaña mós husi Asesora Téknika FDCH, Jurista,  Koordenadór sira iha FDCH no xefe Departamentu balun.

Audiénsia ne’e rasik prezide husi Presidente em Exercicio  Komisaun G,  Sr. Sabino Soares “Guntur” ne’ebé hetan partisipasaun másimu husi deputadu sira membru komisaun G nian.

Komisaun G apresia ho servisu FDCH nian liga ba dezenvolvimentu rekursus umanu iha rai-laran no sujere atu servisu no halo koordenasaun di’ak liután ho Liña Ministeriais no instituisaun estadu  akreditadu sira hodi ezekuta orsamentu tuir planu no programa ne’ebé preve iha OJE ne’ebé hetan aprovasaun husi  Parlamentu Nasionál.

Orsamentu FDCH nian ba tinan 2019 ho montante millaun $20, ne’ebé finansia ba programa prinsipál haat, hanesan Formasaun Profisionál, Formasaun Téknika, Bolsa Estudu no Tipu Formasaun Seluk, to’o ohin loron ezekusaun atuál ba orsamentu 2019 nian atinje ona 58%.

Entretantu Planu proposta OJE FDCH nian ba 2020  ho montante millaun $23 ne’ebé  sei finansia nafatin ba programa dezenvolvimentu rekursus umanus Timor-Leste nian liu husi programa prinsipál haat ne’ebé FDCH iha.

Iha tinan 2020   Liña Ministerial no Instituisaun Estadu Akreditadu sira ne’ebé asesu mai fundu iha FDCH  rasik hamutuk instituisaun  63.  (Média FDCH)

Related Post :


Total Viewer : 497 Views || Category: Notisia