DÍLI-20/10/2017 (FDCH) Secretariado Técnico Fundo de Desenvolvimento do Capital Humano (FDCH) halo aprezentasaun persentajen ezekusaun orsamentu no halo diskusaun kona-ba ezekusaun orsamentu ba formasaun ho diretóres kada liñas ministeriais ne’ebé akreditadu iha FDCH.
Aprezentasaun no diskusaun ne’e realiza tanba haree ba data limitasaun atu hatama relatóriu ezekusaun orsamentu tinan 2017 nian ba Ministériu Planu no Finansas.
Secretario Executivo FDCH Sr. Isménio Martins da Silva hateten enkontru ho diretores kada liñas Ministerias ne’e realiza ho objetivu atu haree hamutuk taxa de ezekusaun no bele haree mós posivilidade atu hatán ba proposta adisionál ne’ebé hatama hosi Ministériu balun.
“Objetivu ita nian ohin ne’e atu ita haree hamutuk taxa de ezekusaun, ita mós bele diskute uitoan tanba ami mós haruka ona karta ba ita boot sira,” dehan Secretario Executivo FDCH Sr. Isménio M. da Silva iha ninia diskursu hodi loke diskusaun ne’e.
Enkontru ne’e realiza tanba hetan mós autorizasaun verbal hosi Ministreiu Planu no Finansas tanba haree ba kalendáriu ezekusaun ne’ebé atu remata daudaun ona.
Iha oportunidade ne’e Coordenador Gabinete Sistema no Pagamentu (GASEPA-FDCH) Sra. Alcina Madeira halo mós aprezentasaun kona-ba ezekusaun orsamentu kada liña ministeriais no iha aprezentasaun ne’e amostra mós katak to’o ohin loron iha Ministériu balun ninia ezekusaun orsamentu ba formasaun seidauk realiza (0%).
Hahú hosi kriasaun FDCH iha tinan 2011 to’o mai ohin loron FDCH akredita ona ninia membru hosi liñas ministerias no ajénsia estadu nian hamutuk 38. (Media FDCH).