Dili- 02/04/2018 Fundo de Desenvolvimento do Capital Humano (FDCH) servisu hamutuk ho Ministériu de Defesa e Segurança liuhosi Diresaun Jerál Servisu Imigrasaun realiza formasaun ida atu kombate no prevene aktus Tráfiku Umanu no oinsá fó asisténsia ba vítima sira tráfiku umanu nian.

Objetivu ba formasaun ne’e atu hasa’e no hakbiit koñesimentu Polísia Servisu Imigrasaun ba investigasaun kazu tráfiku umanu no liuhosi formasaun tráfiku umanu Polísia Servisu Imigrasaun bele iha koñesimentu hodi fó asisténsia ba vítima tráfiku umanu liuhosi liña koordenasaun ne’ebé di’ak no  kriminaliza trafikante.

Sekretáriu Ezekutivu FDCH Sr. Isménio Martins da Silva iha ninia intervensaun hatete katak Polísia Imigrasaun presiza hasa’e liutan sira nia koñesimentu hodi hatán ba globalizasaun.

“Ho mundu agora ne’ebé globalizadu ita presiza hametin liutan kuñesimentu ba ita nia Polísia Imigrasaun sira nune’e bele ona responde kazu sira liuliu ligadu ho tráfiku umanu nian iha Timor-Leste”. Tenik Sr. Isménio durante ninia intervensaun.

Iha biban hanesan bainhira hatán ba jornalista sira Sekretáriu Ezekutivu FDCH ne’e akresenta liutan katak Servisu  Imigrasaun nian importante tebetebes atu bele prevene no hamenus tráfiku umanu iha Timor-Leste

“Koñesimentu mak sai xavi ba ema hotu-hotu, tantu servidores estadu nian hanesan servisu imigrasaun no mós ba públiku sira, no formasaun sira hanesan ne’e pelumenus bele hamenus ita nia nivel krime liuliu iha tráfiku umanu”. Tenik Sr. Isménio Martins da Silva

Entretantu Diretór Jerál Servisu Imigrasaun Superentendente Assistente Polísia Boavida Ribeiro, Lic.Dir. iha ninia intervensaun hato’o ninia agradesimentu ba FDCH tanba iha ona vontade di’ak atu servisu hamutuk ho Diresaun Jerál Servisu Imigrasaun hodi realiza formasaun ne’ebé partisipa husi ema 20 ne’e

“Ami agradese ba FDCH tanba sempre apoiu Servisu Imigrasaun iha formasaun sira hanesan ne’e,” tenik Diretór Jerál ne’e durante ninia intervansaun.

Iha okaziaun abertura ba formasaun ne’e halo mós promosaun diviza ba  Polísia servisu Imigrasaun na’in 4.

Enkuantu formasaun ne’ebé hetan orsamentu husi FDCH ne’e tuir planu sei hala’o durante loron lima (5)nia-laran iha Aulas Servisu Imigrasaun Vila-Verde, Dili. (Media FDCH)

Related Post :


Total Viewer : 1027 Views || Category: Notisia