Turin, 26/01/2018. Fundo de Desenvolvimento do Capital Humano (FDCH) no International Training Center – International Labour Organization (ITC-ILO) hamutuk asina Nota Entendimentu ida iha loron Kinta (25/1). Serimónia ne’ebé hala’o iha Campus ITC-ILO, Torino-Itália ne’e asina direita hosi Sekretáriu Ezekutivu FDCH Sr. Isménio Martins da Silva no Diretór Ezekutivu ITC-ILO Sr. Andreas Klemmer.
Molok asina nota entendimentu, Sekretáriu Ezekutivu FDCH hala’o uluk enkontru ho diretór diresaun sira durante loron rua nia-laran hahú 24-25 Janeiru 2018 ho objetivu atu hatene no koñese di’ak liu-tan programa sira ne’ebé eziste hela iha kampus Sentru Formasaun Internasionál ILO nian ne’e.
Iha ninia introdusaun bainhira hasoru malu ho Sra. Jeannette Shalabi, Diretora Parseiru ba Programa Dezenvolvimentu ITC-ILO, Sekretáriu Ezekutivu ne’e hato’o ninia apresiasaun boot tebe-tebes ba reprezentante organizasaun ne’ebé harii ona iha tinan 1964 ne’e, tanba hatudu duni vontade di’ak atu servisu hamutuk ho Governu Timor-Leste liuhosi Fundo de Desenvolvimento do Capital Humano (FDCH).
“Hodi governu Timor-Leste nia-naran liuhosi FDCH, ha’u agradese no apresia tebe-tebes ba ita-boot sira nia vontade di’ak atu servisu hamutuk ho ami iha area edukasaun no formasaun tékniku vokasionál”, dehan Sr. Isménio Martins da Silva durante ninia introdusaun.
Iha sorin seluk Sra. Jeannette Shalabi ne’ebé sente orgullu bele servisu hamutuk ho Governu Timor-Leste liuhosi FDCH tanba tuir Diretóra katak servisu hamutuk ho Governu Timor-Leste la’ós buat foun maibé hala’o antes ona iha tinan 2007 liu-hosi SEFOPE
“Ba ami mós sente orgullu tanba bele servisu hamutuk fali ho Governu Timor-Leste liu-hosi FDCH” Tenik Diretora ne’e.
Entretantu, iha loron hanesan Sekretáriu Ezekutivu akompaña hosi Xefe Programa Dezenvolvimentu Sra. Mara Cerdeiro halo vizita ba sala sira atu haree no observa besik liu-tan fasilidade sira ne’ebé uza durante formasaun iha kampus refere. Tuir observasaun, vizita ne’ebé Sekretáriu Ezekutivu FDCH ne’e halo maka sala ka aulas aprendizajen hosi programa sira.
Iha loron daruak (25/01), Sekretáriu Ezekutivu FDCH kontinua halo diskusaun ho senior ofisiál sira husi ITC-ILO mak hanesan; Sr. Sherk Verick, Sra. Naima Pages, Sra. Rute Mendes (husi Policy and Analysis Program), Sr. Guilaume Mercier (husi Sustainable Development Program), Sr. Paolo Salvai (husi Employers Activities Program) no Sr. Harry Cunningham (husi Workers Activities Program).
Hafoin diskusaun Sr. Isménio Martins, kontinua ho programa asina Nota Entendimentu ho Diretór Ezekutivu ITC-ILO Sr.Andreas Klemmer akompaña hosi Diretora Parseria ba Programa Dezenvolvimentu Sra. Jeannette Shalabi.
“Ha’u rona barak ona kona-ba diskusaun no programa sira hosi FDCH, tanba ne’e ami laiha dúvida atu servisu hamutuk ho governu Timor-Leste” dehan Sr. Klemmer hafoinn taka ho asinatura Nota Entendimentu entre International Training Center – ILO ho Governu Timor-Leste liu-hosi Fundos de Desenvolvimento do Capital Humano (FDCH),”
Enkuantu iha tinan 2007 ITC fó ona formasaun ba timoroan sira iha nivel ofisiaís hanesan Diretór, Diretór Jerál no Espertu Tékniku sira liu-hosi Sekretáriu Estadu Formasaun no Empregu (SEFOPE). (Media FDCH)