Dili,19/07/2016 (FDCH) Ministériu Planeamentu no Investimentu Estratéjiku – MPIE liu husi Sekretariadu Tékniku FDCH sei halo Levantamentu dadus Rekursu Umanu Ezistente ba kada família iha territóriu tomak.

Levantamentu dadus Rekursu Umanu Ezistente tuir planu sei hahú iha fulan Setembru tinan 2016 no remata iha fulan Fevreiru tinan 2017.

Objetivu husi levantamentu dadus rekursu umanu nian ne’e atu identifika no analiza situasaun rekursu umanus atual iha territóriu tomak tantu iha kada suku, postu administrativu no Munisípiu ne’ebé ninia rezultadu final atu kompleta tan dadus Mapeamentu Rekursu Umanu Nasionál ne’ebé realiza tiha ona iha tinan 2015.

Levantamentu dadus refere sei liu husi servisu hamutuk entre Sekretariadu Tékniku FDCH –MPIE, PNDS-MAE no Estatístika-MF.

Durante soru-mutu ne’ebé hala’o iha salaun MPIE parte FDCH ho PNDS konkorda atu servisu hamutuk oinsá mak bele responde ba objetivu husi  Levantamentu dadus Rekursu Umanu Ezistente.

“PNDS iha rekursu boot, no tau hamutuk rekursu ne’ebé iha MPIE através FDCH bele servisu hamutuk bele utiliza rekursu ne’ebé ita iha hodi atinji objetivu husi levantamentu dadus rekursu umanu ezistente, kooperasaun ne’e utiliza orsamentu ki’ik maibé sei hetan resultadu ida ne’ebé boot, nu-fin parte hotu bele utiliza hamutuk dadus ne’e”. Tenik Sekretáriu Ezekutivu FDCH Sr. Isménio Martins da Silva

PNDS rasik pronto atu kontribui iha parte enumerador sira tanba durante ne’e funsionáriu PNDS kuaze koloka to’o iha postu administrativu no maioria husi sira iha esperiensia naton ligadu ho asuntu refere. Aleinde ne’e parte sira mós diskuti atu halo tan rekrutamentu ba enumerador sira iha kada suku atu reforsa iha ekipa.

“Ami nia parte orgullu tebe-tebes servisu hamutuk, no ida ne’e hanesan previleziu boot atu servisu hamutuk ho FDCH iha asuntu levantamentu dadus rekursu umanu nian ne’e, no ami hakarak fasilita rekursu ne’ebé ami iha, ami mós orienta ona ba funsionáriu sira iha Munisípiu hotu-hotu, ne’ebé sira prontu atu kontribui”. Tenik Diretora PNDS Sra. Ducle Guterres Junior.

Entretantu PNDS ho FDCH iha tempu besik sei kontinua koordena hodi halo preparasaun ne’ebé di’ak inklui halo rekrutamentu, formasaun ba enumerador sira, hamutuk hodi halo revizaun ba kestionáriu no forma ekipa task force ida hodi foku ba servisu levantamentu dadus rekursu umanu ezistente nian ne’e. (Media FDCH)

 

 

Related Post :


Total Viewer : 1150 Views || Category: Notisia