DILI,13/3/2017 Secretario Executivo Fundo de Desenvolvimentu do Capital Humano (FDCH) Isménio Martins da Silva ho ninia ekipa hasoru malu ho Prezidente Komisaun Funsaun Publiku (KFP), Faustino Cardoso  hodi halo introdusaun ba  servisu FDCH nian no  diskute mós oinsá atu iha kooperasaun ne’ebé di’ak hodi haree ba formasaun téknika ne’ebé fornese ba funsionáriu públiku sira.

Secretario Executivo FDCH Isménio Martins hateten ho enkontru ne’e FDCH ho KFP bele fahe informasaun ba malu  nune’e parte rua bele iha koñesimentu ne’ebé di’ak hodi haree ba formasaun ba funsionáriu públiku sira  no oinsá mós atu avalia dezempeñu funsionáriu sira ne’ebé hetan ona formasaun.

Sorumutu ne’ebé hala’o iha salaun enkontru KPF ne’e Sekretáriu Executivo FDCH hahú ho  halo aprezentasaun  ba programa prinsipál haat  ne’ebé iha hanesan Formasaun Professional, Formasaun Tékniku  Bolsa Estudu no Tipu Formasaun Seluk ne’ebé fornese ba públiku timoroan no funsionáriu sira durante ne’e atinje ona 37. 225 hahú husi 2011 mai to’o ohin loron.

“To’o agora ita iha 37 linhas ministeriais ne’ebé mak akreditadu ka hetan asesu ba fundu ne’e rasik, tinan-tinan  ita iha porvolta 11-12 mill benefisiarius, ita sura ho sentru formasaun sira ne’ebé fundu ne’e apoiu atravez da SEPFOPE,” dehan Secreatriu Executivo Isménio Martins.

Entretantu Prezidente KFP, Faustino Cardoso apresia ho servisu ne’ebé FDCH hala’o tanba ne’e prontu servisu hamutuk hodi haree ba formasaun sira ne’ebé atu fó ba funsionáriu públiku sira.

“Ha’u observa, ami akompaña formasaun sira durante ne’e dala balun ba mós la tuir nesesidade instituisaun ninian, dala balun sira ba matéria ne’ebé sira tuir la korresponde ho sira nia servisu iha fatin ninian, entaun mai mós la iha implikasaun ida ba nia dezempeñu  individual no dezempeñu institusional,” dehan Prezidente KFP.

Prezidente KFP ne’e esplika sistema promosaun ba karreira iha KFP ohin loron la hanesan ho esperiénsia  sistema Indonézia hanesan funsionáriu ida kuandu ba ona tuir formasaun hetan ona sertifikadu fila mai halo ajustamentu  automatikamente  maibé ohin loron lae maske funsionáriu ida hetan ona formasaun fila  mai nia tenke hein vaga iha mak foin konkore.

Maske nune’e ohin loron KFP mós tau ona iha nia ajenda hodi hadi’a situasaun ne’e nune’e iha futuru bele hadi’a di’ak liután situasaun ho rigor atu bele hasa’e kualidade rekursu umanu iha funsinalizmu públiku.

Enkontru ne’ebé hala’o durante oras rua resin ne’e husi parte FDCH kompostu husi sekretáriu Executivo FDCH Isménio Martins da Silva, Konsultora  téknika  Ana Paula dos Santos, Diretora SISPA Alcina Madeira, Diretór SEAPLO Henrique do Rosario, Koordenadora Administrasaun no rekursusu Umanus interna Leila C. dos Santos no Xefe Unidade do plano fiscalisasão   Filomeino R. dos S.L. entretantu husi parte KFP partisipa direita husi Prezidente Faustino Cardoso ho ninia diretór sira. (Media FDCH)

Related Post :


Total Viewer : 1963 Views || Category: Notisia