Díli, 5/6/2019. Sekretáriu Ezekutivu Fundo de Desenvolvimento do Capital Humano (FDCH)  Sr. Isménio Martins da Silva akompaña hosi koordenadór GAPPEFIV Sr. Filomeno Lay, hala’o sorumutu ida ho Sekretáriu Estadu Formasaun Profisionál no Empregu  (SEFOPE) Sr. Julião da Silva ho asesór sira iha edifisiu SEFOPE, Caicoli.

Objetivu  sorumutu ne’e hodi ko’alia kona- ba  pedidu proposta programa ne’ebé mak Sekretáriadu Tékniku Fundus Kontrapartida submete atu husu apoiu no autorizasaun SEFOPE nian, nune’e bele hetan asesu fundus husi Secretariado Técnico Fundo de Desenvolvimento do Capital Humano.

Durante sorumutu ne’e ko’alia mós kona-ba planu prioridade ba tinan 2020 to’o 2030, tanba ne’e Sekretáriu Ezekutivu  FDCH Sr. Isménio Martins da Silva hatete iha tinan 2020 FDCH aposta ona osamentu $7 milhoes ba programa SEFOPE haktuir programa VIII Governu Konstitusionál.

“Tinan 2020 FDCH sei aposta orsamentu sete milhões dolar amerikanu,tanba aliña ho polítika ita nia VIII Governu Konstitusionál, katak ita tenke kria empregu no traballadores, ho ida-ne’e ita tenke perpara planu estratéjiku ida ne’ebé di’ak hodi ezekuta orsamentu ne’e ho di’ak ,”Hatete Sekretáriu Ezekutivu FDCH Sr. Isménio Martins da Silva.

Aléinde ne’e Sekretáriu Estadu SEFOPE Sr. Julião da Silva hatete atu estabelese fatin di’ak ida ba formasaun, hodi nune’e bele forma pesoál tuir duni preokupasaun polítika VIII Governu Konstitusionál.

“Ita tenke haree ho kria fatin formasaun ne’ebé ho kapasidade no kuantidade iha area oioin ne’ebé determina tiha ona, atu nune’e ita bele hetan rezultadu  tuir desizaun polítika VIII Governu ne’e nian,” hateten Sekretáriu Estadu Sr. Julião da Silva.

SEFOPE nu’udar Instituisaun estadu  Akreditadu iha FDCH tanba ne’e FDCH kontinua investe maka’as hodi prepara joven sira asesu ba merkadu traballu iha rai laran no rai li’ur haktuir mós ho programa VIII governu nian. (Media FDCH)

Related Post :


Total Viewer : 2132 Views || Category: Notisia