Dili, 4/10/2019. Ministério Ensino Superior, Ciênçia e Cultura (MESCC) liuhusi Fundo de Desenvolvimento do Capital Humano (FDCH) halo lansamentu programa Estájiu Profisionál ba bolseirus graduadus ne’ebé finansiadu husi FDCH iha salaun Ministério Solidaridade Social e Inclusão (MSSI).

Lansamentu ne’e ofisialmente loke husi Diretora Jerál Ministério Ensino Superior, Ciênçia e Cultura Sra. Maria Filomena Lay Guterres ne’ebé reprezenta Ministru MESCC akompaña husi Secretário Executivo do FDCH Sr. Isménio Martins da Silva.

Iha ninia diskursu reprezentante Ministru MESCC ne’e hatete VIII Governu liuhusi MESCC fó importánsia ba dezenvolvimentu rekursus umanus, tanba tuir nia rekursus umanus mak determina kontribuisaun ba prosesu dezenvolvimentu tomak iha rai ida-ne’e.

Iha biban hanesan Diretor Apoio Parlamentar Parlamentu Nasional Sr. Joaquim Afonso iha ninia sasin hato’o katak estajiarius ne’ebé kolokadu ba Sekretariadu Parlamentu Nasional iha abilidade no kapasidade diak hodi hala’o servisu, tan ne’e nia agradese ba FDCH tanba bele prodús rekursus umanus timoroan ho kualidade diak tebetebes. Tuir nia durante ne’e FDCH nia valor apoiu la saugati no la mamuk atu dezenvolve rekursus umanus iha Timor-Leste.

Reitór Universidade Nasional Timor Lorosa’e (UNTL) Profesor Doutor Francisco Miguel Martins ne’ebé sai mós sasin iha serimonia ne’e hato’o ninia agradesimentu ba FDCH tanba tuir nia ho programa estájiu profisional ida-ne’e UNTL hetan tan rekursus umanus kualifikadu hamutuk ema 18 ne’ebé destaka iha Fakuldade sira iha UNTL.

Enkuantu Secretário Executivo do FDCH Sr. Isménio Martins da Silva iha ninia diskursu ba abertura hatete katak fundamentu husi programa estájiu profisional ne’e mak oinsa bele lori bolseirus graduadus sira ne’ebé seidauk hetan servisu tama ba merkadu traballu tuir sira nia área estudu. Lideransa FDCH ne’e aumenta tan katak kontribuisaun mai husi oportunidade, tan ne’e FDCH sei esforsu án nafatin atu loke oportunidade ba bolseirus graduadus sira atu kontribui ba dezenvolvimentu nasional.

“Ema hotu-hotu moris iha objetivu atu halo vida ne’e bele sai util, saida mak bele halo util mak kontribuisaun no atu kontribui ita tenke iha oportunidade diak, oportunidade mak servisu” Tenik Isménio.

Alende ne’e objetivu prinsipál husi programa ne’e mak atu lori graduadus sira ba iha merkadu traballu hodi bele manan esperiénsia no aplika matenek ne’ebé sira iha, nune’e bele harii konfiansa ba sira nia án nomós hametin relasaun entre graduadus ho empregador sira. Molok taka ninia diskursu Sekretáriu Ezekutivu salienta liutan katak programa estájiu professional la’os foin mak akontese iha Timor-Leste maibé nasaun hotu-hotu aplika mós programa hanesan, tanba tuir nia programa estájiu profisional mak nuudar dalan atu halo ema bele hetan servisu lalais.

Tuir dadus, bolseirus graduadus ne’e barak liu mai husi nasaun sira ko’alia lian Inglés no Portugés ne’ebé namkari iha mundu tomak inklui Indonesia no agora daudaun kolokadu ba instituisaun sira mensiona hamutuk 132 estajiarius. Atu aumenta númeru ida-ne’e MESCC liuhusi FDCH sei esforsu nafatin halo koordenasaun ho institusaun sira oinsa bele akomoda bolseirus graduadus ne’ebé seidauk hetan servisu hodi bele involve sira nia án mós iha merkadu traballu.

Entretantu marka mós prezensa iha programa lansamentu refere mak Diretores husi instituisaun sira ne’ebé simu ona estajiarius no estajiarius sira. (Média FDCH)

 

Related Post :


Total Viewer : 516 Views || Category: Notisia