Dili,13/02/2018, Secretario Executivo Fundo de Desenvolvimento do Capital Humano (FDCH) Sr. Isménio Martins da Silva akompaña hosi Koordenadór Gabinete do Plano Pesquisa, Fiscalização e Verificação GAPPEFIV Sr. Filomeno Lay no Jurista FDCH Sra. Estefania Correia da Silva halo enkontru ida ho diretór Jerál, xefe Gabinete no assessor sira Ministériu Defeza no Seguransa (MDS) nian hodi ko’alia kona-ba formasaun ba Falintil Forsa Defeza de Timor-Leste (F-FDTL).
Enkontru ne’ebé hala’o iha salaun enkontru Gabinete Ministru Defeza no Seguransa Fatuhada ne’e parte rua ko’alia liu kona-bá oinsá atu finansia formasaun sira ne’ebé F-FDTL sira sei tuir iha estranjeiru liu-liu iha nasaun sira ne’ebé ohin loron iha ona kooperasaun servisu hanesan Portugal, Brazil no nasaun seluk-tan.
Secretario Executivo FDCH Sr. Isménio Martins da Silva hateten FDCH iha obrigasaun atu koopera no fahe informasaun kona-ba ezekusaun dotasaun orsamentu temporáriu ba liñas ministeriais hotu inklui MDS liu-liu ba formasaun no bolsa estudu.
“Ami iha obrigasaun atu koopera ho ministériu hotu-hotu inklui Ministériu Defeza no Seguransa, iha parte ida ne’e parte F-FDTL nian entaun ohin ami ko’alia kona-ba planu prioridade ne’ebé Ministériu Defeza no seguransa iha liu-liu ita haree ba planu formasaun ba ita nia forsas armadas sira,” dehan Secretario Executivo FDCH.
FDCH prontu servisu hamutuk ho MDS atu bele asegura tiha planu formasaun ba membru armada sira iha rai laran no liu-liu ba formasaun iha rai li’ur ne’ebé iha ona kooperasaun no sei kontinua finansia de’it programa formasaun kontinuasaun ne’ebé iha ona.
Durante enkontru Sectretario Executivo FDCH esplika mós kona-ba prosedimtu ezekusaun Dotasaun Orsamentu Temporáriu nian liga liu ba iha area formasaun no bolsa estudu.
Parte F-FDTL apresia ho enkontru ne’e tanba konsege hetan informasaun ne’ebé klaru no di’ak hosi Secretário Executivo FDCH kona-ba formasaun ba F-FDTL sira.
Iha tempu besik F-FDTL na’in 16 sei ba tuir kursu iha rai li’ur, hosi númeru ne’e na’in 13 sei ba tuir kursu iha Portugal iha area ne’ebé la hanesan tanba na’in 3 sei tuir kursu iha area Naval nian no na’in 10 iha area forsa espesiais, alende ne’e Tenente Koronél na’in 2 sei ba tuir formasaun iha Brazil no ida oras ne’e daudauk tuir hela formasaun iha rai li’ur no tempu badak sei fila mai Timor.
Kursu sira ne’ebé fornese ba F-FDTL sira ho ninia durasaun la hanesan tanba kursu balun ho durasaun fulan ida no balun ho durasaun fulan neen depende ba akordu kooperasaun ne’ebé estabelese ona.
Iha diskusaun ne’e MDS konkorda atu haruka dokumentu akordu sira ne’ebé estabelese ona ho parseiru sira mai FDCH hodi nune’e bele fasilita di’ak liután bainhira atu halo prosesu pagamentu ruma ba benefisiariu sira bainhira atu ba tuir formasaun ruma iha rai li’ur. (Media FDCH)