Dili, 25/10/2018, Fundo de Desenvolvimento do Capital Humano (FDCH) liuhusi Gabinete Planu, Peskiza, Verifikasaun no Fiskalizasaun (GAPPEVIF) hahú hala’o monitorizasaun durante loron rua (2) ba programa formasaun Indusaun Jerál Obrigatóriu ne’ebé halao iha fatin Instituto Nacional da Administração Pública, Comoro, Dili.

Formasaun ne’ebé partisipa husi funsionáriu públika rekrutadu iha tinan 2017-2018 ne’e hala’o ho objetivu prinsipál atu hasa’e kuñesimentu jerál ba lalaok servisu iha administrasaun públika, haklean kuñesimentu funsionáriu sira relasiona ho devér, direitu no obrigasoins servisu iha administrasaun públika no hasa’e inklui hametin funsionáriu sira nia lealdade, nasionalizmu no patriotismu atu lori sira hala’o atendimentu ne’ebé professional no integridade.

Diretór Formasaun Kualifikasaun Profesional INAP, José de Araújo Chang informa katak formasaun iha faze dahuluk ne’e partisipa husi ema 150 no fahe ba aulas 3 (tolu). Maske nune’e, Diretór ne’e aumenta tan katak matérias ne’ebé partisipante sira simu sei laiha diferénsia.

Hanesan ita hotu hatene katak formasaun ne’e fahe ba faze rua. Iha faze dahuluk ne’e partisipante sira hamutuk ema 150 ne’ebé ami fahe ba aulas 3. Maske nune’e matéria ne’ebé sira simu sei laiha diferénsia ruma” informa José Araújo Chang bainhira simu ekipa monitorizasaun FDCH iha ninia knaar fatin.

Entretantu husi Fundo de Desenvolvimento do Capital Humano rasik, monitorizasaun ne’e nuudar parte integradu ida ba kualker programa formasaun ne’ebé hetan finansiamentu husi FDCH.

Prudéncio Dias, Koordenador ekipa monitorizasaun FDCH, iha ninia intervensaun hatete katak monitorizasaun ne’e nuudar meius atu asegura finansiamentu husi investimentu públiku ba formasaun no dezenvolvimentu rekursus umanus iha Timor-Leste.

Ami ohin mai monitoriza formasaunn ida-nee ho objetivu atu asegura finansiamentu husi investimentu públiku ba formasaun sira hanesan ne’e”. Tenik Prudéncio perante partisipante sira.

Atu reforsa liutan objetivu ne’ebé nia temi iha leten, tuir mai Koordenador Ekipa ne’e salienta tan katak atividade (monitorizasaun) ne’e nuudar meius ida atu promove transparánsia no responsabilidade liuhusi hadi’a relatóriu no prestasaun kontas konabá  ezekusaun programa no projetu sira ligadu ho formasaun no dezenvolvimentu kapital umanu.

Iha sorin seluk, Bernardina Octavia Noronha Pereira nuudar partisipante iha formasaun refere hato’o ninia agradeseimentu ba FDCH tanba finansia ona programa formasaun hodi aumenta tan ninia kapasidade.

Hau sente kontente tebes ho programa ne’ebé hatoo’o husi Fundos de Desemvolvimento do Capital Humano mai ami, ne’ebé (formasaun) ne’e atu aumenta tan kuñesimentu ba funsionáriu foun sira ne’ebé iha responsabilidade tebes oinsa atu fó atendimentu ida que diak ba públiku no sai servidor ne’ebé diak liutan iha ita ida-idak nia servisu fatin”. Dehan Médiku ne’e perante ekipa FDCH.

Tanba orgullu ho programa refere, médiku husi munisípiu Covalima ne’e husu atu programa hanesan (formasaun indusaun) labele para deit iha ne’e, maibé bele kontinua tan iha tempu oin mai.

Molok ne’e formasaun refere hala’o ona durante semana rua nia-laran hahú 15-26 Outubru 2018. Enkuantu partisipante sira mai husi Ministériu Saúde, Ministériu Justisa, Ministériu Edukasaun no Servisu Intelijénsia nian. (Média FDCH).

Related Post :


Total Viewer : 808 Views || Category: Notisia