Díli, 24/07/2019. Sekretáriu Ezekutivu Fundo de Desenvolvimento do Capital Humano (FDCH) Sr. Isménio Martins da Silva akompaña husi ninia asesora jurídiku sira hala’o sorumutu ho Prezindente Comissão Função Pública (CFP) Sr. Faustino Cardoso Gomes no Diretór-Jerál Instituição Nacional da Administração Pública (INAP) Sr. Agostinho Letêncio iha sala enkontru edifísiu CFP, Matadouro-Díli.

Ajenda prinsipál husi sorumutu ne’e atu partilla esbosu alterasaun Dekretu Lei n.o 12/2011 konabá estatutu, knaar inklui kompeténsia FDCH nian relasiona ho fornesimentu formasaun no bolsu-estudu.

Sekretáriu Ezekutivu FDCH iha ninia introdusaun hatete kontiúdu esbosu alterasaun Dekretu Lei ne’e prevé mós limitasaun kompeténsia instituisaun nian ba formasaun funsionáriu públiku, tanba tuir nia, durante ne’e FDCH prátika hela formasaun sira tantu ba funsionáriu públiku nomós ba públiku enjeral.

Hatán ba ida-ne’e Prezidente CFP Sr. Faustino Cardoso Gomes hatete oinsa halo aliñamentu ho polítika ne’ebé ejiste. Tan ne’e atu elabora hanoin sira ne’ebé ikus mai sei tau iha proposta nia-laran, Prezidente CFP saliénta katak presiza mekanismu artikulasaun klaramente entre instituisaun relevantes sira, nune’e bele hetan solusaun diak ida atu hato’o pareser ba esbosu alterasaun Dekretu Lei refere inkluzivamente.

Durante sorumutu, lideransa instituisaun tolu (3) ne’e deskute liu konabá konteúdu sira ne’ebé mensiona iha artigu balun esbosu alterasaun Dekretu-Lei nia-laran. Tuir informasaun rezultadu husi enkontru refere sei hato’o fali ba S.E. Ministro Ensino Superior, Ciência e Cultura (MESCC) iha tempu badak.

Antes ne’e Governu liuhusi Ministério Ensino Superior, Ciência e Cultura husu pareser ba parte relevantes (FDCH, CFP no INAP) ba esbosu alterasaun Dekretu-Lei n.o 12/2011 molok lori ba Konsellu Ministru atu hetan aprovasaun.

Marka prezensa iha enkontru refere mak Prezidente CFP, Sr. Faustino Cardoso Gomes, Sekretáriu Ezekutivu FDCH, Sr. Isménio Martins da Silva, Diretór-Jerál INAP Sr. Agostinho Letêncio, Komisárius CFP no Assesor Jurídiku sira husi CFP, FDCH no INAP nian. (Média FDCH)

Related Post :


Total Viewer : 1954 Views || Category: Notisia