Díli-13/07/2018 (FDCH), Sekretáriu Ezekutivu Interinu Fundo de Desenvolvimetno do Capital Humano FDCH, Sr. Filomeno dos Santos Lay partisipa iha serimónia sosializasaun programa bolsa estudu ba timoroan sira ne’ebé hala’o hosi Universidade Esa Unggul, iha edifísiu Pusat Budaya Indonesia Mascarinhas Dili.
Programa sosializasaun ne’e hala’o hosi Vise Reitor asuntu kooperasaun Universidade Esa Unggul Dra. Suryari Purnama ho nia ekipa, ne’ebé akompaña direita hosi Embaixadór Indonesia ba Timor-Leste Sr. Sahat Sitorus no Adidu edukasaun Indonesia ba Timor-Leste Sr. Edi Sedecor Melatunan.
Iha tinan ne’e Universidade Esa Unggul ne’ebé lokaliza iha Jakarta Indonesia ne’e oferese bolsa estudu regular ba timoroan na’in lima (5), alende ne’e iha mós bolsa parsial ne’ebé sei fornese ba timoroan sira atu ba hala’o sira nia estudu.
Tuir informasaun ne’ebé iha universidade Esa Unggul oferese bolsa estudu ba timoroan sira hahú iha 2016, ohin loron bolseiru timoroan na’in sanulu (10) mak hala’o hela sira nia estudu iha universidade ne’e.
Entretantu Partisipante sira ba eventu sosializasaun ne’e mai hosi estudante no mestre sira hosi eskola sekundáriu sira iha Dili laran hanesan Eskola Secundario Cristal, Eskola Secundario ANUR no Eskola Secundario Cologio São Miguel.
Universidade Esa Unggul lokaliza iha sidade Jakarta Indonesia, informasaun klaru liu bele asesu direita ba iha portal universidade ne’e (www.esaunggul.ac.id) no bele hakbesik mós ba KBRI Dili . (Media FDCH)

Related Post :


Total Viewer : 757 Views || Category: Notisia