Dili, 24/01/2019. Fundo de Desenvolvimento do Capital Humano (FDCH) afirma prontu atu asegura programa formasaun lian Portugés ba professores timoroan sira iha tinan 2019 nian.

Liafuan ne’e Sekretáriu Ezekutivu FDCH Sr. Isménio Martins da Silva hato’o hafoin rona no haree tiha aprezentasaun programa sira husi Instituto Nacional de Formação de Docentes e Professionais da Educação de Timor-Leste (INFORDEPE) iha salaun enkontru Ministério da Educação, Juventude e Desporto (MEJD) Vila-Verde, Dili.

Aprezentasaun ne’ebé foka liu ba programa formasaun ne’e hetan apresiasaun husi S.E. Ministra da Educação, Juventude e Desporto Sra. Dulce de Jesús Soares no sujere ba FDCH atu fó komentáriu no haree ba konteúdu sira liga ho orsamentu.

Hatán ba ida-ne’e, Sekretáriu Ezekutivu FDCH afirma nia pozisaun prontu kolabora no suporta programa sira (formasaun) nian husi INFORDEPE.

“Husi parte FDCH, apresia mós ho planu programa sira ne’e no ami prontu atu kolabora” Isménio haktuir.

Liutan, lideransa FDCH ne’e mós kompremetidu atu asegura programa refere liuhusi fundus ne’ebé FDCH prevé ona iha orsamentu 2019 nian.

“Iha tinan ida-ne’e (2019) ami prevé ona orsamentu formasaun nian, tanba ne’e dala ida-tan hau dehan katak FDCH prontu asegura programa ita-boot sira nian ne’e” tenik lideransa FDCH ne’e.

Rona tiha afirmasaun husi Sekretáriu Ezekutivu, S.E. Ministra Dulce de Jesús Soares agradese ba FDCH tanba bele koopera ona ho programa MEJD liuhusi programa INFORDEPE nian ne’e.

“Hau apresia no agradese tebes tanba ohin Señór Sekretáriu Ezekutivu FDCH bele marka prezensa iha ne’e atu rona no prontu koopera ho MEJD ba programa sira ne’ebé hato’o husi INFORDEPE” Tenik Ministra.

Enkuantu iha sorin seluk, governante ne’e konkorda atu haree liután planu orsamentu sira husi programa ne’e ho efetivu.

“Hau konkorda Sekretáriu Ezekutivu nia hanoin katak tenke fó vista ba programa sira, nune’e ita bele hare orsamentu ho efetivu liu” hatutan governante ne’e.

Tuir observasaun, molok ne’e Sekretáriu Ezekutivu FDCH hato’o ninia opinioens no sujere ba parte INFORDEPE atu haree diak liután orsamentu ba programa sira ne’ebé aprezentadu.

Marka prezensa iha enkontru ne’e S.E. Ministra MEJD Sra. Dulce de Jesús Soares, Sekretáriu Ezekutivu FDCH Sr. Isménio Martins da Silva, Prezidente INFORDEPE, Diretores no asesores sira.(Media FDCH)

Related Post :


Total Viewer : 738 Views || Category: Notisia