DILI, 21/06/2017 (FDCH) Secretariado do Fundo de Desenvolvimento do Capital Humano –FDCH  hari’i ho papél importante ida atu haforsa kualidade rekursu umanus timoroan nian hodi prepara ba dezenvolvimentu nasaun foun ne’e nian tanba ne’e prontu atu reforsa kapasitasaun ba funsionáriu sira iha Ministériu Públiku.

Secretário Executivo Fundo de Desenvolvimentu do Capital Humano (FDCH) Sr. Isménio Martins da Silva akompaña husi Koordenador GAPPEFIV Sr. Paulo M. dos Santos halo enkontru ida ho Prokurador Geral da República  (PGR) S.E. Dr. José Da Costa Ximenes hodi ko’alia kona-ba kooperasaun servisu FDCH ho PGR atu reforsa kapasitasaun rekursu umanu hodi hadi’a no haforsa di’ak liután servisu Ministériu Públiku ninian.

Enkontru ne’ebé hala’o iha Gabinete PGR Colmera ne’e, Secretario Executivo FDCH Sr. Isménio Martins da Silva kongratula mós Procurador Geral da Republica Sr. José Da Costa Ximenes ba ninia segundu mandatu 2017-2022.

Secretário Executivo Sr. Isménio Martins da Silva hatete FDCH prontu atu foka no  aloka maka’as liután orsamentu ba Ministériu públiku hodi haforsa area justisa ninian iha Timor-Leste.

“Haree ba planu no programa husi PGR nian, iha tinan oin 2018 Secretariado do FDCH hakarak sujere hodi aumenta tan orsamentu no prontu atu asegura ida ne’e, ha’u fiar katak ita sei halo diskusaun husi parte téknika hodi diskute,” dehan Sr. Isménio Martins da Silva iha diskusaun ne’e.

Entretantu Procurador Geral da Republica Sr. José Da Costa Ximenes agradese ba apoiu FDCH nian durante ne’e tanba susesu ne’ebe PGR hetan konta mós ho apoiu FDCH ninian.

“Ha’u agradese ba apoiu ne’ebé fó ona, iha ha’u nia segundu mandatu ne’e ha’u hetan oportunidade atu servisu ho ita-boot sira,” hatete Procurador Geral da Republica José da Costa Ximenes.

Prokuradoria da Republika nu’udar mós membru akreditadu iha FDCH tanba ne’e iha tinan 2017 ho orsamentu hamutuk $265.000 hodi fó formasaun ba funsionáriu sira.

Entretantu enkontru ne’e parte rua ko’alia liu kona-ba servisu hamutuk hodi reforsa kapasitasaun rekursu umanu liu husi formasaun no bolsa estudu hodi hasa’e liután kualidade servisu Ministeriu Publiku ninian iha area judisiariu.

Durante diskusaun parte rua mós konsege konkorda atu fó bolsa estudu mestradu ba magistradu nain 2 ba tinan oin 2018 no bolseiru ne’e sei hala’o de’it ninia estudu iha rai laran.(Media FDCH)

Related Post :


Total Viewer : 1224 Views || Category: Notisia