Dili, 28/02/2018 Fundo de Desenvolvimento do Capital Humano (FDCH) simu vizita ida hosi Japan International Cooperation Center (JICE) liuhosi The Project for Human Resource Development Scholarship by Japanese Grant Aid (JDS) hodi ko’alia kona-ba kooperasaun entre instituisaun rua ne’e iha futuru liga ba bolsa estudu ba timoroan sira.
Enkontru ne’ebé hala’o iha salaun Knowledge Center FDCH ne’e partisipa direita hosi Secretário Executivo FDCH Sr. Isménio Martins da Silva ne’ebé akompaña mós hosi koordenadór no xefe departamentu FDCH nian hanesan koordenadóra GAFRHI-FDCH Sra. Leila Carceres, Koordenador GAPPEFIV-FDCH Sr. Filomeno Lay, Asesora FDCH Sra. Ana Paula dos Santos xefe departamentu DESTI Sr. Ivo Juvito Belo no xefe departamentu DEPPEFIV Sra. Maria Rosa.
Entretantu ekipa JDS kompostu hosi program Officer JDS Junichi Yamazaki, Country officer Yuko Hijashi no Joanico da Silva nu’udar assistant Country officer iha Timor-Leste.
Durante enkontru program Officer JDS Junichi Yamazaki hateten JDS nia programa iha Timor-Leste atu suporta no dezenvolve rekursus umanus iha setór públiku ne’ebé fó liu oportunidade ba funsionáriu permanente sira iha instituisaun governu nian no funsionáriu sira ne’ebé atu kompete ba bolsa ne’e tenke hala’o ona ninia knar hanesan funsionáriu públiku permanente durante tinan rua ba leten.
Bolsa estudu ho grau mestradu ho durasaun estudu tinan rua ne’ebé JDS oferese ba timoroan sira atu ba hala’o estudu iha Japaun ne’e iha area prioridade tolu hanesan: 1) Improving Administrative Ability and Institution Building 2) Rural and Industry Development 3) Improvement of Transportation/ urban Environment Development.
Bolsa hosi governu Japaun ne’e kada tinan sei fó oportunidade ba timoroan na’in 8 no programa bolsa ne’e sei fornese ba timoroan sira durante tinan 4 ho espetativa katak benefisiariu sira bainhira remata sira nia estudu fila mai tenke kontribui ba dezenvolvimentu sosiál no ekonómiku nasaun foun ne’e nian.
Prezensa ekipa ne’e iha FDCH nu’udar parte ida atu buka hatene servisu FDCH nian iha ámbitu dezenvolvimentu rekursus umanus no kooperasaun FDCH nian durante ne’e ho país sira seluk iha mundu.
Secretário Executivo FDCH Sr. Isménio Martins da Silva apresia ho programa JDS nian tanba bele kontribui dezenvolve rekursus umanus Timor-Leste nian tanba ne’e FDCH prontu atu servisu hamutuk ho JDS iha futuru tanba FDCH ninia papél importante iha Timor-Leste mak atu dezenvolve rekursu umanus nasaun foun ne’e nian bazeia ba Planu Estratéjiku Dezenvolvimentu Nasionál (PEDN) 2011-2030.
Iha enkontru ne’e Secretário Executivo FDCH Sr. Ismenio Martins da Silva aprezenta mós sistema Beneficiary Management Information System (BMIS) no website ofisiál FDCH nian no enkontru ne’e remata ho hasai foto hamutuk.(Media FDCH)