Oe-Cusse, 22/03/2018, Kapasitasaun Rekursu Umanus ba funsionáriu públiku no timoroan hola parte asuntu ne’ebé importante tebes nune’e bele prepara timoroan sira asesu ba kampu servisu ho fasil no lalais.

Rejiaun Administrativu Espesial Oe-Cusse Ambeno (RAEOA) no Zona Espesiál Ekonomia  Sosiál no Merkadu (ZEESM) sei koopera di’akliu-tan ho Fundo de Desenvolvimentu do Capital Humano (FDCH) atu prepara timoroan sira ho kualifikadu nune’e bele servisu iha rejiaun administrativa espesiál ne’e bainhira kondisoens sira preparadu ona.

Tanba ohin loron fasilidade no kondisaun estadu komesa prepara ona hanesan Klínika kurasaun, aeroportu ne’ebé besik finalize daudaun ona no investimentu importante sira ne’ebé hala’o hela iha RAEOA.

“Ohin loron iha Oe-Cusse kondisaun hotu-hotu komesa preparadu tanba ne’e presiza tebes prepara rekursus umanus atu bele prepara ba kondisoens sira ne’e,” hateten Sra. Leonia Monteiro ne’ebé reprezenta prezidente RAEOA.

Durante diskursu ba serimónia abertura formasaun Nivel Munisipiu no asina akordu téknika Instituto Nacional da Administração Publica (INAP) ho Dili Institute Technology (DIT)  ne’ebé hala’o iha Rejiaun Administrativu Espesiál Oe-Cusse Ambeno- RAEOA.

Nia hateten RAEOA hahú haruka ona Doutór na’in 6 ba hasai sira nia espesialista iha Portugal nune’e fila mai bele servisu ho di’ak liu-tan iha klínika kurasaun RAEOA.

“Ita prepara kondisoens ita presiza rekursus umanus rua ne’e liga malu, sei koopera di’ak ho Fundo de Desenvolvimento do Capital Humano atu haruka-tan espesialista sira ba hasa’e tan sira nia kapasidade,” tenik Sra. Leonia Monteiro

Nia informa mós katak Konsellu Ministru foin lalais aprova tiha ona atu prosesa rekursu magnesium iha Oe-Cusse tanba ne’e presiza rekursu umanu mós, tanba ne’e rekursus umanus tenke preparadu iha area oin-oin.

Entretantu Secretario Executivo Fundo de Desenvolvimento do Capital Humano (FDCH) Sr. Isménio Martins da Silva hateten FDCH nia servisu mak atu asegura planu Estratéjiku Dezenvolvimentu  Nasionál (PEDN)  ba timór laran tomak iha  ámbitu formasaun profisionál  prepara futuru traballadores kualifikadus  ba merkadu traballu, ida fali reforsa funsionáriu públiku sira iha formasaun no bolsa estudu tanba ne’e prontu servisu hamutuk ho RAEOA ZEESM.

“Iha programa bolsa estudu iha tinan ne’e iha orsamentu ne’ebé disponivel ba RAEOA ZEESM, espera katak iha tinan ne’e RAEOA ZEESM bele ezekuta sira nia osan, iha osan ne’ebé primeiru ita fó uluk ba médiku espesialista sira, balun ba ona Portugal ho ZEESM nia osan rasik balun ne’ebé indireitamente kanaliza tuir FDCH atu hein katak tinan ne’e ita bele iha tan estudante médiku sira atu haforsa tan sira nia espesialidade iha médiku nian,” hatete Sekretáriu Ezekutivu FDCH Sr. Isménio Martins.

Oe-Cusse konsidera nu’udar rejiaun administrativu espesiál bainhira lei númeru 3/2014 Parlamentu Nasionál aprova ho unanimidade ba lei ne’e hosi membru paralmentu sira hodi implementa programa, planu kontextu Zona Espesiál Ekonomia Sosiál de Merkadu.

Tanba ne’e ohin loron Oe-Cusse hahú prepara no dezenvolve fasilidade no kondisaun oin-oin hanesan harii ona hospital ba fuan nian, Aeroportu no dezenvolvimentu infrastrutura boboot sira iha rejiaun ne’e importante tebes prepara rekursus umanus ho kualifikadu nune’e bele servisu bainhira kondisoens hira ne’e kompleta ona.(Media FDCH).

Related Post :


Total Viewer : 1087 Views || Category: Notisia