DILI, 30/01/2018. Fundo de Desenvolvimento do Capital Humano (FDCH) konvoka enkontru ida ho inan aman bolseiru Kombatentes no Veteranus nian oan na’in 52 ne’ebé hala’o hela sira ninia estudu iha Universidade Institut Teknologi Sepuluh Nopember Surabaya (ITS) ho Universitas Udayana Bali Indonesia.
Enkontru ne’e realiza ho objetivu atu fahe no relata progresu estudu bolseiru sira nian ba inan aman sira hafoin ekipa monitorizasaun hosi FDCH halo tiha monitorizasaun hodi haree direita progresu estudu bolseiru sira nian no bolseiru sira ninia hela fatin iha Indonesia foin lalais ne’e.
Enkontru ne’e loke direita hosi Sekretáriu Ezekutivu interinu FDCH Sr. Filomeno Lay, no partisipa iha enkontru ne’e mak koordenadóra GAFRHI Sra. Leila Carceres, koordenadór GAGESI Sr. Henrique do Rosario, koordenadór GAPLO Sr. Eusebio Bareto konsultora téknika FDCH Sra. Ana Paula dos Santos, Jurista FDCH Sra. Estefania da Silva, staf teknika GASEPA sra. Lucia Ximenes no inan aman bolsieru sira.
Durante enkontru koordenadora GAFRHI Sra. Leila Carceres ne’ebé nu’udar xefe ba ekipa monitorizasaun relata ba inan aman bolseiru sira kona-ba progresu no dezafiu estudu bolseiru na’in 52 ne’ebé hala’o daudaun sira ninia estudu.
Iha oportunidade ne’e FDCH entrega mós valor bolseiru sira nian ba inan aman hodi nune’e inan aman mós bele hatene oan sira nia valor oinsá no husu ba inan aman sira atu enkoraja no motiva liután oan sira atu hala’o sira ninia estudu to’o remata.
Entretantu inan aman sira apresia ho servisu ne’ebé FDCH halo tanba ne’e husu atu kontinua halo monitorizasaun ba estudu bolseiru sira nian tinan ida dala ida nune’e bele motiva estudante sira halo sira ninia estudu ho di’ak liután, no maioria inan aman sira sujere atu oan sira hela iha asrama ne’ebé prepara ona ba sira.
Bolseiru timoroan na’in 52 ne’e dezloka ba hala’o sira nia estudu iha Indonesia iha tinan kotuk (2017), hosi númeru ne’ebé iha bolseiru na’in 42 hala’o sira nia estudu iha Institut Teknologi Sepuluh Nopember Surabaya no na’in 10 hala’o sira nia estudu iha Universitas Udayana Bali Indonesia. (Media FDCH)