Dili, 04 Jullu 2024.Ministériu Planeamentu no Investimentu Estratéjiku (MPIE) liuhusi Fundo de Desenvolvimento do Capital Humano (FDCH), realiza Workshop Kona-ba Estudu Mapeamentu  Rekursu Umanu ba Setór Públiku no Privadu iha Timor-Leste ho dirijente sira husi  Linas Ministeriais, setór privadu, Universidade/Institutu  públiku no privadu ) nomos Administrasaun Munisipiu sira iha salaun Delta Nova.

Objetivu husi workshop ne’e hodi halo divulgasaun informasaun ba dirijente setór públiku no privadu sira kona-ba Estudu Mapeamentu ba Rekursus Umanus Timor-Leste nian ne’ebé FDCH sei realiza iha fulan ne’e, bazeia ba programa  Governu Konstitusionál da-sia ne’ebé  re-afirma fali  atribuisaun   medidas  ba FDCH  atu halo fali  “Atualizasaun  Mapeamentu Rekusus Umanus ba Setór Públiku no Privadu”.

Sua Exélensia Ministru Planeamentu no Investimentu Estratéjiku (MPIE) nu’udar Prezidente Konsellu Administrasaun FDCH, Eng. Gastão Francisco de Sousa ne’ebé halo abertura ba workshop ne’e husu ba parte hotu atu kolabora no apoiu  nune’e, estudu mapeamentu ne’e bele realiza ho susesu hodi bele hetan rezultadu ne’ebé di’ak no sai hanesan matadalan dezenvolvimentu rekursus umanu Timor-Leste nian iha tinan hirak ne’ebé mai.

Governante ne’e husu ba kada ministériu no instituisaun estadu no  privadu sira atu identifika área prioridade sira iha planu programa anual, halo proposta hodi submete ba FDCH hodi tetu ba iha bolsu estudu no formasaun sira tantu espesífiku no profisionál tuir nesidade rekursus umanus instituisaun ida-idak nian.

Diretór Ezekutivu FDCH, Júlio Aparício hateten FDCH sei sai hanesan fatin ne’ebé naroman ba ema hotu tanba ne’e governu da-sia ho FDCH hakarak loke FDCH ne’e ba ema hotu, FDCH povu nian, FDCH ba povu, mai husi povu, nune’e liu husi  wokshop ida ne’e planu hotu-hotu ba formasaun, planu ba bolsa estudu tenke mai husi povu, mai husi instituisaun governu, instituisaun hotu-hotu ne’ebé reprezenta povu  nu’udar povu nia lian no povu nia aspirasaun.

Diretór Ezekuitvu  agradese ba prezensa dirijente sira husi parte hotu ne’ebé partisipa iha workshop ne’e no nafatin husu ba dirijente sira hodi koopera no kolabora atu simu ekipa teknika sira husi FDCH bainhira tun ba terenu halo peskiza bele hetan rezultadu ida ne’ebé di’ak no bele hetan  mós informasaun sira kona-ba rekursu umanu saida mak iha ona no rekursu saida mak FDCH presiza apoiu hodi formatan iha futuru. DE sita mós  matenek na’in E.F. Schumacher ne’ebé hateten katak “Dezenvolvimentu labele hahú husi sasan maibé hahú husi ema, tanba ema mak abut no hun ba riku soin hotu-hotu iha mundu.”  No ita nia maun boot Kay Rala  Xanana Gusmão  mós hateten katak rikusoin loloos la’os mina-rai no sasan maibé ema, tanba ne’e FDCH prontu prepara osan no planu ne’e mai husi Lina ministerial no instituisaun sira.

Estudu mapeamentu rekursu umanu ne’e realiza  servisu hamutuk entre Universidade  Nasionál Timor Lorosáe  (UNTL) ho FDCH ne’ebé sei hala’o durante fulan 9 (sia) nia laran, Alvu husi estudu mapeamentu ne’e maka setór públiku ( Institusaun públiku no Linas Ministeriais sira), setór privadu (Kamara Komérsiu Industria, Universidade/Institutu  públiku no privadu ) nomós Administrasaun Munisipiu sira.(Média-FDCH)

Related Post :


Total Viewer : 69 Views || Category: Notisia