Dili, 11/02/2019, Secretariado Técnico  Fundo de Desenvolvimento do Capital Humano (ST-FDCH) kontinua investe maka’as ba dezenvolvimentu rekursus umanus iha setór oioin hodi prepara timoroan sira  ba kampu servisu iha rai laran no rai li’ur, hodi kontribui ba dezenvolvimentu ekonomia nasaun foun Timor-Leste nian.

Maske iha tinan 2019 FDCH ho orsamentu ne’ebé ki’ik, millaun $20 de’it kompara ho tinan hirak liubá maibé projesaun ba tinan 2019 FDCH sei benefisia timoroan hamutuk 13.565.

Secretario Executivo do FDCH Sr. Isménio Martins da Silva hatete orsamentu FDCH nian ba tinan 2019 ho montante ne’ebé ki’ik liu kompara ho orsamentu sira tinan hirak liubá tanba iha tinan ne’e FDCH ho de’it orsamentu millaun $ 20 .

Hosi orsamentu millaun $20 ne’e sei finansia programa prinsipál haat ne’ebé FDCH iha durante ne’e hanesan, Formasaun Profisionál ho montante orsamentu $1.984.550,00, Formasaun Téknika $6.537.775,20, Bolsa Estudu $9.285.321,32 no Tipu Formasaun seluk $2.192.353,48.

Entretantu projesaun númeru benefisiarius ba programa haat ne’ebé iha, iha tinan 2019 FDCH  sei benefisia timoroan 13.565  hosi númeru ne’e Feto 5.030 no Mane 8.535.

Secretário Executivo  FDCH hato’o informasaun ne’e iha aprezenta preparasaun implementasaun programas no atividades ST-FDCH nian ba OJE 2019 iha soru-mutu  Ministro Ensino Superior Ciência e Cultura (MESCC) S.E. Sr. Longuinhos dos Santos no Secretario Estado Arte e Cultura (SEAC) Sr. Teófilo Caldas ho  Diretores Jerais MESCC, Asesor sira no  diretóres SEAC, iha salaun reuniaun MESCC  iha eis edifísiu Alfandega Colmera.

Ministru MESCC S.E. Sr. Longuinhos dos Santos husu atu kanaliza orsamentu ne’ebé iha ho di’ak nune’e bele fó benefísiu ba timoroan sira.

Ministru mós orgullu ho servisu FDCH durante ne’e, ne’ebé iha kooperasaun di’ak tebes, liu-liu sempre atualiza relatóriu trimestral ba ministru.

“Ha’u orgullu ho ita boot sira, liu-liu relatóriu trimestral ne’ebé sempre hatama mai ha’u haree, no relatóriu ne’ebé hato’o mai ha’u sempre hato’o ba primeiru Ministru,” hatete Ministru MESCC.

Entretantu iha soru-mutu ne’e diretóra jerál hosi SEAC husu FDCH atu tulun no husu atu iha kooperasaun di’ak liután ho FDCH hodi prepara rekursus umanus iha area biblioteka nasionál tanba tuir planu konstrusaun ba biblioteka nasionál  sei hahú iha 2019 no sei remata iha 2021 nune’e importante tebes atu prepara rekursus umanus iha area ne’e.

Akompaña Secretário FDCH iha aprezentasaun ne’e mak Assessora  ST FDCH Sra. Ana Paula dos Santos,  Koordenadór GAPEFIV-FDCH  Sr. Filomeno  dos Santos Lay no  Koordenadora GAFRHI-FDCH  Sra. Leila Carceres.

Ohin loron membru akreditadu  FDCH hamutuk 52 kompara ho tinan kotuk 42, membru akreditadu hirak ne’e mai hosi liña Ministeriais no instituisaun sira estadu nian. (Media FDCH)

Related Post :


Total Viewer : 1221 Views || Category: Notisia