Dili,23/06/2015(FDCH) Sekretariadu Tékniku FDCH halo soru-mutu ho Vice Ministru Finansa Sr. Helder Lopes, objetivu husi soru-mutu ne’e nudár parte preparasaun no oinsá mak bele simu feedback ruma husi Ministériu Finansa kona-ba levantamentu dadus rekursus umanus ezistente ba kada família iha territóriu tomak.

Reuniaun refere marka prezensa husi Vice Ministru Finansas, Sekretáriu Ezekutivu FDCH, Peskizadór FDCH inklui reprezentante husi Diresaun Nasionál Estatístika.

Aléinde simu feedback parte sira diskuti mós hodi buka posibilidade servisu hamutuk entre ministerial hodi halo poupansa ba gastus peskiza nian.

Tuir Vice Ministru Helder Lopes katak estudu ka levantamentu dadus rekursus umanus refere tenke konsidera hanesan estudu ho nivel nasionál hodi nune’e parte hotu bele kontribui ho diak.

“Hau sujere atu imi (FDCH) lori ideia survei ida ne’e ba Konsellu Ministru hodi konsidera hanesan nivel nasionál nune’e ministeriu sira bele fo apoiu maximu durante survey ne’e”. Tenik Vice Ministru Sr. Helder Lopes

Vice Ministru haktuir Diresaun Nasionál Estatístika sei kontribui iha ekipa peskiza nian hodi apoiu nafatin iha parte tékniku hanesan oferese enumeradór no hare hamutuk metodolojia tanba Diresaun Nasionál Estatístika iha ona esperiensia servisu iha area peskiza nian, apoiu hanesan Diresaun Nasionál Estatístika oferese tiha ona ba estudu dahuluk FDCH nian kona-ba Avaliasaun Rezultadu Programa FDCH Periodu 2011-2014 no estudu Mapeamentu Rekursu Umanu Nasionál ba Setór Públiku no Setór Privadu.

Enkuantu Sekretáriu Ezekutivu Sr. Isménio Martins da Silva durante sorumutu  haktuir katak levantamentu dadus rekursu umanu kada familia iha teritoriu tomak nudar kontinuasaun husi estudu dahuluk nian kona-ba Mapeamentu Rekursu Umanu Nasional ba Setór Públiku no Setór Privadu ne’ebé finaliza ona iha tinan 2015.

“Importante ba ami iha Sekretariadu mak oinsa hetan advise husi Vice no akompañamentu husi Diresaun Nasionál Estatístika, entermus de númeru ka rekursu ami sei esforsu maibe sei nafatin iha koordenasaun diak hodi bele atinzi survey ne’e”. Tenik Sekretáriu Ezekutivu Sr. Isménio Martins da Silva.

Maske iha prinsipiu diskusaun ne’e Vice Ministru Finansa preokupa ho prosesu levantamentu dadus ne’e maibe hafoin hetan tiha esplikasaun husi ekipa FDCH parte sira konklui katak posibildade atu involve Ministeriu relevante hanesan MPIE-FDCH, Ministériu Finansa- Estatistika Nasionál, Ministériu Administrasaun Estatal no Ministeriu Edukasaun. Sei minimiza kustu no servisu ho efisiensia

Entretantu Sekretariadu Tékniku FDCH durante periódu fulan Juñu – Agostu sei nafatin buka posibilidade atu servisu hamutuk ho Ministériu relevante hodi realiza estudu daruak nian kona-ba Levantamentu Dadus Rekursu Umanu Ezistente Kada Uma-Kain iha Territóru tomak.(media fdch)

Related Post :


Total Viewer : 1291 Views || Category: Notisia