DILI,23/3/2017 Fundo de Desenvolvimento do Capital Humano (FDCH) selebra tinan moris ba dala VI (23 Marsu 2011-23 Marsu 2017)  selebrasaun ne’ebé hala’o iha salaun enkontru Ministeriu Planeamentu Investimentu Estratéjiku (MPIE) Fatuhada Dili.

Sectretario Executivo FDCH, Isménio Martins da Silva ho ninia funsionáriu sira selebra eventu ne’ebé  ho  simples tebes maibé lori motivasaun servisu ba funsionáriu sira liu husi aprezentasaun progresu servisu FDCH dezde harii to’o ohin  loron..

Selebrasaun ne’e hahú hala’o ho konta istória ezistensia FDCH nian husi inísiu to’o mai ohin loron maske hasoru dezafiu oin-oin maibé konsege ultrapasa dezafiu sira ne’e hodi hatudu servisu di’ak atu dezenvolve rekursu umanu nasaun foun ne’e nian.

Prezensa Secretario Executivo FDCH, Isménio Martins da Silva durante tinan tolu konsege lori mudansa lubuk ida ba dezafiu sira ne’ebé durante ne’e iha, hanesan konsege lori FDCH sai ajénsia ida ne’ebé hamriik mesak kompara ho antes ne’e FDCH harii providénsiado ba Ministériu Edukasaun.

Progresu ne’ebé iha durante ne’e mak hanesan FDCH halo ona estudu  boot tolu hanesan  Avaliasaun ba servisu FDCH husi 2011-2014, Mapeamentu ba  Rekursu Umanu iha Setór Públiku  no Levantamentu Dadus ba Rekursus Humanus ba Timor-Leste tomak. konsege  aselera prosesu pagamentu ba benefisiariu sira, konsege akredita Liña Ministériu no ajénsia estadu nian hamutuk 37.

Komesa jere direita programa bolsa estudu dahuluk iha tinan 2017  ne’ebé oferese ba Kombatentes no Veternus nian oan atu ba hala’o estudu iha Indonézia.

Ohin loron FDCH mós  iha ona Giaun  ba Formasaun no Bolsa Estudo, Atu iha mos Giaun ba Rekursus Humanos Interna,  Atu iha mós Giaun  ba Servisu operasionál sira FDCH nian, iha Estrutura fiksu ne’ebé aprova husi Prezidente  Conselho Administração Fundo de Desenvolvimento do Capital Humano (CA-FDCH) S,E Kay Rala Xanana Gusmão.

Entretantu atu haforsa servisu iha sekretariadu FDCH konsege halo mós rekrutamentu ba funsionáriu sira tanba iha inísiu FDCH harii ho de’it funsionáriu na’in sia (9) ho nune’e to’o iha 2017 FDCH konsege iha ona ninia funsionáriu hamutuk na’in 54.

Funsionariu sira ne’ebé iha konsege hala’o sira nia servisu iha Seksaun sira hanesan Seksaun Sistema Pagamentu (SISPA), Seksaun Planu Peskiza no Fiskalizasaun (SEPPEFI) Seksaun Aprovizionamentu no Lojistika (SEAPLO) Seksaun Jestaun Informasaun (SEGESI) no Koordenadór ba Administrasaun no rekursus umanus internu (CARHI).

Hetan ona espasu fatin servisu iha INFORDEPE (EX-UNAMET) ba Seksaun Planu peskiza no Fiskalizasaun  (SEPPEFI), no iha Fatuhada (Edifisiu MPIE) ba areas Seksaun Sistema Pagamentu (SISPA) , Seksaun Aprovizionamentu no Lojistiku (SEAPLO) Seksaun Jestaun Sistema informasaun ( SEGESI) Koordenadór no  Administrasaun  rekursus umanus internu (CARHI)  no Gabinete Secretário Executivo do FDCH.

Atu forma timoroan sira ho abilidade ne’ebé di’ak, ohin loron FDCH kontinua mantein ninia programa prinsipál haat (4) hanesan Formasaun Professional ne’ebé oferese ba timoroan tomak  liu husi  SEPFOPE ba sentru formasaun sira ne’ebé hetan akreditasaun,  Formasaun Téknika ba funsionáriu públiku tomak , Bolsa estudu  ba timoroan hotu no Tipus formasaun seluk ne’ebé oferese ba PNTL, FDTL, Juis no seluktan.

Tanba ne’e  hahú husi 2011-2014 mai to’o ohin loron konsege fó formasaun ba timoroan  31 .802  ho orsamentu ne’ebé aloka hamutuk millaun $137,448  no kontinua servisu hamutuk ho liña ministériu sira no memebru akreditadu sira atu kontinua fó formasaun ba timoroan sira.

FDCH harii ka estabelese ho Lei  Parlamentu Nasionál, ne’ebé halo aprovasaun ba Orsamentu Jerál Estado (OJE) ho no 1/2011 iha 14  Fevreiru 2011, husi Artigu 7o to’o Artigu 9o no mós termus previstos iha Artigu 32o husi Lei  Parlamentu no 13/2009, 21 Outubru  2011, 23 Marsu, alteradu no repúblikadu  ho Dekretu-Lei (DL) nº 11/2015, 03 Juñu ho objetivu prinsipál atu hasa’e kualidade timoroan nian no prepara jerasaun foun ba dezenvolvimentu Timor-Leste.

Tanba ne’e FDCH kontinua hala’o ninia servisu hodi kontribui ba hasa’e kapasidade timoroan nian atu prepara jerasaun foun ba futuru dezenvolvimentu Timor-Leste nian tuir Planu Estratéjiku Dezenvolvimentu Nasionál (PEDN) 2011-2030  ne’ebé nasaun foun ne’e hatuur ona. (Media FDCH)

Related Post :


Total Viewer : 1078 Views || Category: Notisia