DILI,01/02/2017 (FDCH) Sekretáriu Ezekutivu Fundu Dezenvolvimentu Kapital Umanu (FDCH), Isménio Martins da Silva ho diretór Jerál Sekretariu Estadu Politika Formasaun Profesionál no Empregu (SEPFOPE), Paulo Alves diskute kontratu institusional ne’ebé Governu Timor-Leste halo ho mestre sira lian Korea no diskute mós oinsa atu reforsa sentru treinamentu sira iha rai laran nune’e bele fó formasaun ho kualidade ba timoroan sira.
Sorumutu ne’ebé hala’o durante oras ida resin iha Gabinete Diretór Jeral SEPFOPE ne’e, Sekretariu Ezekutivu FDCH, husu ba SEPFOPE atu haree didi’ak kontratu ne’ebé estabelese ona ho mestre sira lian Korea nian iha sentru formasaun sira ne’ebé estabele ona.
“Buat ida ha’u hakarak komprende husi ita nia kontratu ba profesores sira ne’e sira simu tiha sira nia salariu, sira iha tan regalias oin-oin, ida ne’e tenke haree didi’ak, tanba iha kontratu ne’eba ladun koalia, kontratu ida servisu ho individu ne’e mak tenke haree mós,”Hatete sekretario ezekutivo Isménio Martins da Silva.
Sekretáriu Ezekutivu Isménio Martins da Silva mós preokupa ho komportamentu mestre sira nian tanba bainhira ekipa sira tun ba baze indentifika mestre balun la hanorin ho átivu.
Entretanto diretór KSLP, Bae Jaekyong ne’ebé durante ne’e trata kontratu mestre sira lian Korea nian konkorda atu senvisu hamutuk ho parte governu hodi haree ba kontratu ne’ebé estabele ona.
Tanba ne’e sira prontu atu hatama hotu kontratu individu mestre sira nian iha relatoriu nune’e bele hatene progresu servisu ne’ebé mestre sira hala’o.
Nune’e mós diretór Jerál SEPFOPE Paulo Alves hatete, iha tinan ne’e númeru timoroan sira ne’ebé rejistu atu tuir kursu lian Korea barak teb-tebes nune’e iha mós planu atu bolu timoroan sira ne’ebé hatene lian Korea atu hanorin fali timoroan sira ne’ebé hakrak atu aprende.
“Tinan ida ne’e ita overload, tanba labarik sira ba rejistu kuaze três mil e tal, ami labele tampun hotu, to’o ema complain ba ami ne’ebé ami hatete ba sira katak la’os ami lakohi simu hotu, maibe ami rezerva de’it, sira ne’e bele tama fali iha Juñu depois de sira seluk ezame tiha, tanba númeru ne’e barak teb-tebes ami labele atende ho kapasidade rekursu umanu ne’ebé menus,” Dehan diretór Jeral SEPFOPE Paulo Alves
Tanba haree ba timoroan barak ne’ebé hakarak atu aprende lian Korea nian diretór Jeral ne’e informa ona ba iha Sekretariu Estadu SEPFOPE, Ilidio Ximenes no koalia ona ho sentru formasaun tolu hanesan Becora, Tibar no Dom Bosco atu fasilita fatin ba formasaun no formador sira sei rekruta timoroan sira ne’ebé ohin loron hatene ona lian Korea.
Hatan ba preokupasaun ne’e sekretario ezekutivo FDCH Isménio Martin da Silva hateten FDCH pronto atu fó apoiu ba SEPFOPE tanba sira iha programa formasaun barak ne’ebé sei prepara timoroan sira ho skil ne’ebé di’ak atu tama ba merkadu traballu nian.(Media FDCH)