Díli 08/09/2020, Komisáriu Komisaun Funsaun Publika (KFP) Sr. Fausto Freitas da Silva “Liurai Tasi” reprezenta Prezidente KFP, ofisialmente entrega Relatóriu Rekollamentu Planu Formasaun no Dezenvolvimentu ba funsionáriu públiku sira tinan 2021 mai Diretora Ezekutiva Fundo de Desenvolvimento do Capital Humano Sra. Leila Carceres dos Santos no Diretór Jerál Instituto Nacional Administração Publica (INAP) Sr. Agostinho Letencio.
Serimónia ne’e hala’o iha Sala Reuniaun KPF, Matadoru ne’ebé hahú ho aprezentasaun husi Diretór Nasionál Formasaun no Dezenvolvimentu Sr. Francisco da C. Pereira kona-bá prosesu rekollamentu planu no programa formasaun no bolsa estudu ba funsionáriu públiku sira iha tinan 2021 husi Liña Ministerial no Instituisaun Estadu sira ne’ebé akredita no asesu fundu mai iha FDCH.
Durante prosesu rekollamentu, ekipa simu planu husi Liña Ministerial no Instituisaun Estadu Akreditadu hamutuk 41 no planu formasaun ne’ebé submete abranje ba kategoria jenériku ho pursentu 54% no espesifiku 46 %.
Aléinde programa formasaun jenériku no espesífiku iha instituisaun hamutuk 10 mak submete planu bolsa estudu ho total vaga hamutuk 156 iha area oin-oin ho nivel estudu mestradu (S2) no nivel ki’ik liu mak diploma 2 (D2).
Husi relatóriu rekollamentu ne’e planu formasaun sira ho porsentu 70 (70%) sei hala’o iha rai laran no porsentu 30 ba formasaun iha rai-li’ur ne’ebé barak liu indika fatin formasaun iha nasaun viziñu Indonézia.
Iha intervensaun Diretora Ezekutiva FDCH Sra. Leila Carceres hato’o parabéns ba CFP ne’ebé konsege organiza instituisaun relevante sira hodi ko’alia kona-bá programa formasaun no bolsa estudu ba funsionáriu públiku sira iha 2021, relasiona ho dekretu lei nú 13/2020 15 de Abríl Regulamentu FDCH nian ne’ebé atribui mós kompeténsia ba CFP ho INAP.
Kona-bá relatóriu ne’ebé KFP entrega, parte FDCH sei haree no halo mós avaliasaun ba programa sira ne’ebé iha, liga ho tetu orsamentu 2021 FDCH nian.
Relasiona ho demanda (Perminta-an) iha programa formasaun no bolsa estudu husi LM no Instituisaun estadu sira ne’ebé akredita mai iha FDCH kontinua aumenta ba be-beik kada tinan hodi kontribui ba hasa’e abilidade no kapasidade funsionáriu públiku sira nian iha area oin-oin.
FDCH sujere atu LM ho Instituisaun estadu akreditadu sira atu fó énfaze maka’as liu iha formasaun sira ne’ebé espesífiku no hamenus ona formasaun sira ne’ebé jenériku no relasiona ho surtu Covid-19 husu mós atu formasaun hotu-hotu tenke konsentra iha rai-laran.
Plano no programa ne’e rekolla husi ekipa Teknika ne’ebe forma husi Secretariado Comissão da Função Publica (SCFP), INAP ho Sekretariadu Tékniku FDCH ne’ebé antes ne’e halo avaliasaun no aprosimasaun ba programa hotu LM ho instituisaun estadu sira nian molok submete mai FDCH . (Média_FDCH)