DILI,14/8/2017 (FDCH) Fundo de Desenvolvimento do Capital Humano-FDCH realiza Enkontru Sosializasaun ba Programa Buka Tuir Benefisiariu (BTB) liu–liu ba Bolseirus Graduadus sira ba liñas Ministériu sira.
Reuniaun ne’e ho objetivu atu oinsa tau hamutuk hanoin nune’e bele identifika bolseiru graduadu sira hahú hosi 2011-2017 ne’ebé finansia hosi FDCH ba liña ministériu 11.
Programa Buka Tuir Benefisiariu(BTB) ne’e realiza hodi hatán ba preokupasaun públiku nian ligadu ho investimentu ba rekursus umanus nasaun foun ne’e nian ohin loron to’o iha ne’ebé no benefisiariu sira ne’e remata tiha sira nia estudu sira servisu iha ne’ebé no konsege absorve iha merkadu traballu rai laran ka lae.
Secretário Executivo Fundo de Desenvolvimento do Capital Humano FDCH Sr. Isménio M. da Silva hateten programa BTB mosu atu identifika impaktu hosi benefisiariu sira.
“Durante ne’e governu realiza formasaun no bolsa estudu ba públiku timoroan no funsionáriu sira tanba ne’e programa BTB ne’e mosu atu haree no identifika took impaktu hosi benefisiariu sira ne’e to’o iha ne’ebé no benefisiariu graduadu sira ne’e iha ne’ebé ho nune’e ita hakarak koordena malu ho di’ak liu-tan,” hatete Sr. Isménio M. da Silva hodi loke enkontru ne’e iha salaun Knowledge Center eis eidifisiu Ministériu Finansas.
Nune’e mós Coordenador Gabinete Gestão Sistema no Informasaun GAGESI-FDCH Sr. Henrique do Rosario haforsa tan katak programa ne’e mosu atu halo análiza no hatene loloos benefisiariu ho ninian distribuisaun Rekursus Umanus no rezultadu FDCH ninian finansiamentu durante ne’e.
Entretantu programa ne’e mosu sei ajuda mós atu hatene loloos areas ne’ebé mak graduadus (formandos no bolseiros) remata maibé susar atu hetan servisu no atu kompleta liutan relatóriu Levantamentu de Dadus (LDRH) ne’ebé FDCH sei públika tuir mai.
Programa BTB sei implementa faze por faze I: sei hahú ho graduadus bolsa estudu ba benefisiariu sira hamutuk 2,618 bazeia ba dadus hosi tinan 2011-2017. Faze II : Programa Formasaun Profisionál ba formadus hamutuk 21,142 bazeia ba dadus husi tinan 2011-2017. Faze III : Programa Formasaun Téknika ba Formadus hamutuk 23,202 bazeia ba dadus hosi tinan 2011-2017 no Faze IV : Tipus Formasaun Seluk ne’ebé ninia formadus hamutuk 7418 bazeia ba dadus hosi tinan 2011-2017.
Total benefiaisiru hahú hosi ezisténsia FDCH iha tinan 2011 mai to’o 2017 hamutuk 58,464 ne’ebé konsege tuir programa prinsipál haat (4) ne’ebé FDCH iha hanesan Formasaun Profisionál, Formasaun Téknika, Bolsa Estudu no tipu formasaun seluk.
Durante enkontru diretor sira kada liñas ministeriais no pontu fokal sira FDCH nian konkorda atu koopera di’ak liutan nune’e bele realiza programa ne’e nune’e bele hetan dadus ho di’ak no kompletu liutan. (Media FDCH)